'అర్జున్ రెడ్డి' బ్యాచ్ మైత్రీ కుదురుతోందా..?

'అర్జున్ రెడ్డి' సినిమాతో సెన్సేషన్ క్రియేట్ చేశారు హీరో విజయ్ దేవరకొండ - డైరెక్టర్ సందీప్ రెడ్డి వంగా. అయితే ఇప్పుడు ఈ ఇద్దరి కాంబోలో మరో సినిమా రాబోతోందని ఫిలిం సర్కిల్స్ లో టాక్ నడుస్తోంది. ప్రముఖ నిర్మాణ సంస్థ మైత్రీ మూవీ మేకర్స్ వీరిద్దరి కలయికలో ఓ ప్రాజెక్ట్ సెట్ చేస్తోందట. విజయ్ దేవరకొండ ఇంతకముందు మైత్రీ బ్యానర్ లో 'డియర్ కామ్రేడ్' సినిమా చేసాడు. అదే సమయంలో మరో ప్రాజెక్ట్ కి కమిట్మెంట్ ఇచ్చాడని తెలుస్తోంది. ఈ నేపథ్యంలో సందీప్ వంగా దర్శకత్వంలో సినిమా సెట్ చేయడానికి ప్రయత్నాలు జరుగుతున్నాయట.

ఇటీవల సందీప్ - విజయ్ కలిసి ఓ స్క్రిప్ట్ గురించి చర్చించారట. దీనిపై విజయ్ దేవరకొండ నుంచి పాజిటివ్ రెస్పాన్స్ వచ్చిందట. ప్రస్తుతం కమిట్ అయిన ప్రాజెక్ట్స్ పూర్తైన తర్వాత ఈ సినిమా ఉండే అవకాశం ఉంది. విజయ్ ప్రస్తుతం పూరీ జగన్నాథ్ దర్శకత్వంలో 'లైగర్' అనే పాన్ ఇండియా మూవీ చేస్తున్నాడు. అలానే సుకుమార్ దర్శకత్వంలో ఓ ప్రాజెక్ట్ అనౌన్స్ చేశాడు. ఇక సందీప్ బాలీవుడ్ హీరో రణబీర్ కపూర్ తో 'యానిమల్' అనే సినిమా చేస్తున్నాడు. మరి ఈ సినిమాలు కంప్లీట్ అయిన తర్వాత 'అర్జున్ రెడ్డి' కాంబోలో మరో సినిమా షురూ అవుతుందేమో చూడాలి.