‘ఫిదా’ ఫీట్ రిపీటవుతుందా..?

‘ఫిదా’ రిలీజ్ రోజు పాజిటివ్ టాక్ తెచ్చుకున్నపుడు ముందుగా ఈ సినిమా అమెరికాలో మిలియన్ మార్కు దాటుతుందా అన్న చర్చ మొదలైంది. కానీ ఆ సినిమా మిలియన్ మార్కు కాదు.. ఏకంగా 2 మిలియన్ మార్కును దాటేసి సంచలనం సృష్టించింది. దీని కంటే ముందు దిల్ రాజు బేనర్ నుంచే రిలీజైన భారీ బడ్జెట్ సినిమా ‘దువ్వాడ జగన్నాథం’కు ఎంతో స్టార్ వాల్యూ ఉన్నప్పటికీ మిలియన్ మార్కును దాటి ముందుకు వెళ్లలేకపోయింది. కంటెంటే కింగ్ అని.. దాని ముందు స్టార్ వాల్యూ పనికి రాదని చెప్పడానికి ఇదే రుజువు. ఇప్పుడు ‘అర్జున్ రెడ్డి’ సినిమా కూడా ఇదే విషయాన్ని రుజువు చేస్తోంది. ఈ సినిమా తెలుగు రాష్ట్రాల్లోనే కాదు.. అమెరికాలో సైతం కళ్లుచెదిరే వసూళ్లు రాబడుతోంది.

ప్రిమియర్లతోనే 2 లక్షల డాలర్ల దాకా వసూలు చేసిన ఈ సినిమా.. శుక్రవారం కూడా దుమ్ముదులిపింది. తొలి రోజు ముగిసే సమయానికే 4 లక్షల మార్కును దాటేసిన ఈ సినిమా వీకెండ్ అయ్యేసరికే మిలియన్ మార్కును టచ్ చేసినా ఆశ్చర్యం లేదంటున్నారు. ఈ ఊపు చూస్తే.. ‘అర్జున్ రెడ్డి’ సైతం 2 మిలియన్ మార్కును అందుకున్నా అందుకోవచ్చేమో. ఈ తరహా విభిన్న సినిమాలు యుఎస్ తెలుగు ఎన్నారైల అభిరుచికి బాగా నప్పుతాయి. మరోవైపు తెలుగు రాష్ట్రాల్లో ‘అర్జున్ రెడ్డి’ ఊపు మామూలుగా లేదు. తొలి రోజే తెలుగు రాష్ట్రాల్లో మూడున్నర కోట్ల దాకా షేర్ వచ్చింది. ఫుల్ రన్లో ‘అర్జున్ రెడ్డి’ వరల్డ్ వైడ్ షేర్ రూ.30 కోట్లు దాటేలా కనిపిస్తోంది.