అర్జున్ సురవరం రిలీజ్ డేట్ ఇదే

యువ హీరో నిఖిల్.. లావణ్య త్రిపాఠి హీరో హీరోయిన్లుగా నటిస్తున్న చిత్రం 'అర్జున్ సురవరం'. తమిళంలో సూపర్ హిట్ అయిన 'కనిదన్' కు రీమేక్ గా ఈ సినిమా తెరకెక్కుతోంది. ఈ సినిమాలో ఇన్వెస్టిగేటివ్ జర్నలిస్ట్ అర్జున్ లెనిన్ సురవరం పాత్రలో నిఖిల్ నటించాడు. కొద్దిరోజుల క్రితం రిలీజ్ అయిన ఈ సినిమా టీజర్ కు ఆడియన్స్ నుండి మంచి స్పందనే లభించింది. తాజాగా ఈ సినిమా నిర్మాతలు రిలీజ్ డేట్ ను లాక్ చేశారు.

ప్రేక్షకులకు ఉగాది శుభాకాంక్షలు తెలుపుతూ 'అర్జున్ సురవరం' మే 1 న రిలీజ్ అవుతుందని కొత్త పోస్టర్ ద్వారా తెలిపారు. నిజానికి ఈ సినిమా మార్చ్ 29 న రిలీజ్ కావాల్సి ఉంది. కానీ వాయిదా పడడంతో ఈ సమ్మర్ సీజన్ ను మిస్ అవుతుందేమోనని అనుకున్నారు. ఇప్పుడు కొత్త డేట్ తో రిలీజ్ పైన నెలకొన్న డౌట్స్ అన్నీ క్లియర్ అయ్యాయి. ఈ పోస్టర్ విషయానికి వస్తే నిఖిల్ - లావణ్య జోడీ ఫుల్ రొమాంటిక్ మూడ్ లో ఉన్నారు. లావణ్యను సున్నితంగా కౌగలించుకుని నిఖిల్.. నిఖిల్ భుజంపైన ప్రేమగా చెయ్యివేసిన లావణ్య... ఒకరి కళ్ళలోకి ఒకరు తదేకంగా చూసుకుంటూ ప్రపంచానికి అర్థం కాని.. ప్రేమికులకు మాత్రం అర్థమయ్యే ప్రేమ సందేశాలను 6G స్పీడ్ సిగ్నల్స్ తో పంపుకుంటూ ఉన్నారు. బ్యాక్ గ్రౌండ్ లో పండువెన్నెల పోస్టర్ కు మరింత అందాన్ని తీసుకొచ్చింది.

సామ్ సిఎస్ ఈ చిత్రానికి సంగీత దర్శకుడు. తమిళ ఒరిజినల్ వెర్షన్ దర్శకుడు టీ సంతోష్ 'అర్జున్ సురవరం' చిత్రానికి దర్శకత్వం వహిస్తున్నారు. ఠాగూర్ మధు ఈ సినిమాను నిర్మిస్తున్నారు.