RC15 లో సునీల్ కోసం ప్రత్యేక పాత్ర క్రియేట్ చేశారా?

మెగాప‌వ‌ర్ స్టార్ రామ్ చ‌ర‌ణ్ క‌థానాయ‌కుడిగా RC15 ఇటీవ‌ల హైదరాబాద్ లో ఘ‌నంగా ప్రారంభ‌మైన సంగ‌తి తెలిసిందే. ఈ సంద‌ర్భంగా ర‌ణ్ వీర్ సింగ్ - మెగాస్టార్ చిరంజీవి-ఎస్.ఎస్.రాజ‌మౌళి త‌దిత‌రులు ముఖ్య అతిథులుగా లాంచింగ్ వేడుక‌ను నిర్వ‌హించ‌గా అందుకు సంబంధించిన ఫోటోలు అంత‌ర్జాలంలో వైర‌ల్ అయ్యాయి. ఆస‌క్తిక‌రంగా లాంచింగ్ డే రోజున రిలీజ్ చేసిన పోస్ట‌ర్ ఆద్యంతం ఈ సినిమాపై స‌ర్వ‌త్రా ఉత్కంఠ‌ను పెంచింది.

ఇందులో న‌టీన‌టులు ద‌ర్శ‌క‌నిర్మాత‌లు అంతా ఖ‌రీదైన సూట్స్ బ్లేజ‌ర్స్ ధ‌రించి ఫైల్స్ ప‌ట్టుకుని సీరియ‌స్ గా వెళుతున్న దృశ్యం క‌నిపించింది. శంక‌ర్ మ‌రోసారి ఒకే ఒక్క‌డు ఫీట్ ని రిపీట్ చేస్తున్నారా? ఆ సినిమాకి సీక్వెల్ ని తీస్తున్నారా? అంటూ అంద‌రిలో ఒక‌టే సందేహం రాజుకుంది. ఈ పోస్ట‌ర్ లో అందాల కియ‌రా అద్వాణీ సీరియ‌స్ అధికారిలా క‌నిపిస్తున్న చెర్రీ ప‌క్క‌నే క‌నిపించింది. బ‌హుశా త‌న పాత్ర ఐఏఎస్ అధికారి అయిన చ‌ర‌ణ్ కి పీఏగా క‌నిపిస్తుందా? అన్న‌ది సుస్ప‌ష్ఠంగా అర్థ‌మ‌వుతోంది. అంతేకాదు కియ‌రా పాత్ర క‌థ‌నే మ‌లుపు తిప్పే విధంగా ఉంటుంద‌ని కూడా లీకులు తాజాగా అందాయి.
RC15 లో కీలక మలుపు తీసుకురావడానికి ఈ పాత్రను శంక‌ర్ డిజైన్ చేశార‌ని కూడా గుస‌గుస‌లు వినిపిస్తున్నాయి.

కేవలం డ్యాన్సులు పాట‌ల‌ రొమాన్స్ కోసమే కియ‌రా పాత్ర ప‌రిమితం కాద‌ని తెలిసింది. శంకర్ ఆమెకు కీలక పాత్రలో ఛాన్సిచ్చారు. గ్లామ‌ర్ ఎలివేష‌న్ ని మించి ఆమె పాత్ర కథలో భారీ మలుపు తీసుకువస్తుందని యూనిట్ వర్గాల సమాచారం. కియారా సౌత్ నార్త్ లో అగ్ర క‌థానాయిక‌. త‌న పాత్ర చాలా బలంగా ఉన్నందున శంకర్ స్క్రిప్ట్ విని వెంటనే ఓకే చేసిందట‌.

ఆస‌క్తిక‌రంగా ఈ చిత్రంలో సునీల్ కి అవ‌కాశం ద‌క్కింది. లాంచింగ్ డే రిలీజ్ చేసిన పోస్టర్ లో హాస్యనటుడు సునీల్ కూడా ఈ చిత్రంలో భాగం అవుతారని స్పష్టమైంది. మంచి రన్ టైమ్ తో నెగటివ్ షేడ్స్ ఉన్న పాత్ర‌లో సునీల్ క‌నిపిస్తార‌నేది ఒక గుస‌గుస‌. ఈ సినిమాలో సునీల్ ని శంక‌ర్ ఓ కీలక పాత్ర కోసం ఎంపిక చేశార‌ట‌.

సునీల్ ఇటీవ‌ల క్యారెక్ట‌ర్ న‌టుడిగా రీలాంచ్ అయ్యేందుకు ఎంతో శ్ర‌మిస్తున్నారు. త్రివిక్ర‌మ్ స‌హా ప‌లువురు ద‌ర్శ‌కులు అత‌డికి ఇంపార్టెంట్ పాత్ర‌ల్ని ఆఫ‌ర్ చేశారు. కానీ మునుప‌టి కామెడీ టింజ్ అత‌డిలో క‌నిపించ‌లేదు. ఇలాంటి స‌మ‌యంలో తనను తాను తిరిగి ఆవిష్కరించుకునే అరుదైన అవ‌కాశాన్ని శంక‌ర్ క‌ల్పించార‌ని భావిస్తున్నారు. శంకర్ ఈ పొలిటికల్ థ్రిల్లర్ కోసం సునీల్ ని డిఫ‌రెంట్ యాంగిల్ లో చూసార‌ట‌. త‌న పాత్ర‌ను నెగెటివ్ షేడ్ తో ఎలివేట్ చేస్తార‌ని తెలిసింది. మొత్తానికి పాన్ ఇండియా సినిమాలో పాన్ ఇండియా డైరెక్ట‌ర్ అతనికి ఒక ఘనమైన పాత్రను అందించాడు. ఈ సినిమాతో సునీల్ కి అవ‌కాశాల వెల్లువ తిరిగి మొద‌ల‌వుతుంద‌ని భావించవ‌చ్చు. థ‌మ‌న్ ఈ చిత్రానికి సంగీతం అందిస్తుండ‌గా.. శ్రీ‌వెంక‌టేశ్వ‌ర క్రియేష‌న్స్ లో దిల్ రాజు నిర్మిస్తున్నారు.

టైటిల్ ప్ర‌క‌ట‌న ఎప్పుడు?

దాదాపు 500కోట్ల బ‌డ్జెట్ తో అత్యంత భారీగా తెర‌కెక్క‌నున్న ఈ క్రేజీ చిత్రానికి శంక‌ర్ ఎలాంటి టైటిల్ ని ఎంపిక చేశారు? అంటే... కాస్త వెరైటీ టైటిల్ ఇటీవ‌ల‌ ప్ర‌చారంలోకి వ‌చ్చింది. శంకర్ ఈ చిత్రానికి `విశ్వంభర` అనే టైటిల్ ని ఎంపిక చేశారని ప్ర‌చార‌మ‌వుతోంది. శంకర్ గతంలోనూ పొలిటికల్ థ్రిల్లర్ సినిమాలు చేశారు. కానీ ఈసారి టైటిల్ ఎంపిక కాస్త ఆలోచింప‌జేస్తోందని క‌థ‌నాలొచ్చాయి. అయితే టైటిల్ ని అధికారికంగా ప్ర‌క‌టించాల్సి ఉంది. చ‌ర‌ణ్ ని మునుపెన్న‌డూ చూడ‌నంత విభిన్నంగా ఒక‌ పొలిటిక‌ల్ థ్రిల్ల‌ర్ క‌థాంశంలో శంక‌ర్ చూపించ‌నున్నారు. ఇందులో అత‌డు ఛాలెంజింగ్ యువ‌ ముఖ్య‌మంత్రిగా క‌నిపిస్తార‌ని ప్ర‌చారం ఉంది.