'అశోకవ‌నంలో అర్జున కళ్యాణం': అల్లం అర్జున్ కు పిల్ల కావలెను..!

ఇటీవల 'పాగల్' తో పలకరించిన మాస్ కా దాస్ విశ్వ‌క్ సేన్.. ఇప్పుడు ''అశోకవ‌నంలో అర్జున కళ్యాణం'' అనే సినిమాతో రాబోతున్నాడు. టైటిల్ తోనే ఈ సినిమాపై ఆసక్తిని కలిగించిన మేకర్స్.. తాజాగా మరి ఇంట్రెస్టింగ్ అప్డేట్ తో వచ్చారు. ఈ చిత్రంలో విశ్వక్ పాత్రని పరిచయం చేస్తూ ఓ వీడియోని విడుదల చేసారు. నెలకు 70 వేల జీతం సంపాదిస్తున్నా 34 ఏళ్ళు దాటిపోయినా పెళ్లికాని అల్లం అర్జున్ కుమార్ పాత్రలో విశ్వక్ సేన్ కనిపించనున్నారు.

ఈ వీడియోలో విశ్వక్ సేన్ తన పొట్ట కనిపించకుండా టక్ చేసుకోవడం.. వయస్సు కనిపించకుండా బట్టతలను సరిదిద్దుకోవడం వంటివి నవ్వు తెప్పిస్తున్నాయి. ఇందులో తనకు మూడు పదుల వయస్సు దాటిపోయిందని.. పొట్ట కూడా వచ్చిందని.. తమ క్యాస్ట్ లో అమ్మాయి దొరకడం లేదని.. సంబంధం చూసిపెట్టమని ఆడియన్స్ ని అర్జున్ రిక్వెస్ట్ చేస్తున్నాడు. తనకు ఎలాంటి పట్టింపులు లేవని.. కట్నం కూడా వద్దని.. పూర్తి బియోడేటా ఇస్తా అమ్మాయిని మాత్రం చూసి పెట్టండి అంటూ అభ్యర్థించడం అలరిస్తోంది.

ఈ సందర్భంగా అల్లం అర్జున్ కుమార్ కు పిల్ల కావాలని చెబుతూ విడుదల చేసిన పోస్టర్ కూడా ఆకట్టుకుంది. చింతా మ్యారేజ్ బ్యూరో పేరుతో అర్జున్ బియోడేటాతో ఈ పోస్టర్ డిజైన్ చేయబడి ఉంది. ''అశోకవ‌నంలో అర్జున కళ్యాణం'' లో విశ్వక్ సేన్ గత చిత్రాల కంటే కంప్లీట్ డిఫరెంట్ లుక్ లో కనిపిస్తున్నాడు. ఇప్ప‌టి వ‌ర‌కూ యూత్ ఫుల్ మాస్‌ ఎంటర్టైనర్లతో యూత్ ఆడియన్స్ కి దగ్గరైన విశ్వక్.. ఈ సినిమాతో ఫ్యామిలీ ప్రేక్షకులను టార్గెట్ చేస్తున్నారని తెలుస్తోంది.

'అశోకవ‌నంలో అర్జున కళ్యాణం' చిత్రానికి విద్యాసాగ‌ర్ చింతా దర్శకత్వం వహిస్తున్నారు. ఈ చిత్రానికి ర‌వికిర‌ణ్ కోలా స్క్రిప్ట్ అందించారు. జై క్రిష్ సంగీతం సమకూరుస్తున్నారు. పవిత్రన్ సినిమాటోగ్రఫీ అందిస్తుండగా.. విప్లవ్ ఎడిటింగ్ వర్క్ చేస్తున్నారు. బీవీఎస్ఎన్ ప్ర‌సాద్ స‌మ‌ర్ప‌ణ‌లో ఎస్‌వీసీసీ డిజిట‌ల్ బ్యాన‌ర్‌ పై బాపినీడు - సుధీర్ ఈదర సంయుక్తంగా ఈ చిత్రాన్ని నిర్మిస్తున్నారు. విశ్వక్ సేన్ కెరీర్ లో వస్తున్న ఈ 7వ సినిమా మాస్ కా దాస్ కు ఎలాంటి గుర్తింపు తెచ్చిపెడుతుందో చూడాలి.