వాళ్లిద్దరి కలల చిత్రం ఆగస్టు 12న

గత ఏడాది ‘బాహుబలి’ సినిమా చూసి నామోషీగా ఫీలైపోయారు బాలీవుడ్ జనాలు. శేఖర్ కపూర్ లాంటి దిగ్దర్శకుడు.. రాజమౌళిని చూసి బుద్ధి తెచ్చుకోండంటూ బాలీవుడ్ డైరెక్టర్లకు తలంటిపోశాడు. ఐతే బాలీవుడ్ లో కూడా అప్పుడప్పుడూ గొప్ప గొప్ప ప్రయత్నాలే జరుగుతుంటాయి. సంజయ్ లీలా బన్సాలీ.. అశుతోష్ గోవారికర్ లాంటి డైరెక్టర్లు భారీ ప్రాజెక్టుల్నే తలకెత్తుకుంటూ ఉంటారు. ఆల్రెడీ బన్సాలీ ‘బాజీరావ్ మస్తానీ’తో సెన్సేషన్ క్రియేట్ చేశాడు. ఈ ఏడాది అశుతోష్ ఓ ప్రతిష్టాత్మకమైన సినిమాతో ప్రేక్షకుల ముందుకు రాబోతున్నాడు. అదే.. మొహెంజదారో.

ఇంతకుముందు హృతిక్ రోషన్ తో ‘జోదా అక్బర్’ లాంటి ప్రెస్టీజియస్ మూవీ చేసిన అశుతోష్.. ఈసారి ‘మొహెంజదారో’ లాంటి భారీ ప్రయత్నాన్ని తలకెత్తుకున్నాడు. ఈ సినిమా కోసం దాదాపు మూడేళ్లుగా శ్రమిస్తున్నాడు అశుతోష్. షూటింగ్ మొదలుపెట్టి కూడా ఏడాదిన్నర అయింది. నిన్నటితో షూటింగ్ పూర్తయిపోయింది. ఈ సందర్భంగా హృతిక్-అశుతోష్ కలిసి రిలీజ్ డేట్ కూడా అనౌన్స్ చేసేశారు. ఆగస్టు 12న ఈ చిత్రం ప్రపంచవ్యాప్తంగా ప్రేక్షకుల ముందుకు రాబోతోంది. దాదాపు రూ.150 కోట్ల భారీ బడ్జెట్ తో తెరకెక్కిన ఈ చిత్రాన్ని అశుతోషే స్వయంగా నిర్మించడం విశేషం. హీరోయిన్ పూజా హెగ్డే ఈ సినిమా కోసమని సౌత్ లో ఎన్నో ఆఫర్లు వదులుకుని ఏడాదిన్నరగా దీనికే అంకితమైంది. హృతిక్ సహా అందరూ అలాగే కష్టపడ్డారు. మరి వీళ్లందరి కలల సినిమాకు ప్రేక్షకులు ఎలాంటి ఫలితాన్నిస్తారో చూడాలి.