విజ‌య్‌ తోనే ద‌త్ ప్లాన్ చేశారా?

ఇల‌య‌ద‌ళ‌ప‌తి విజ‌య్‌ తో డ‌బుల్ ధ‌మాకా మోగించాడు అట్లీ. `తేరి` సినిమాతో బ్లాక్‌ బ‌స్టర్ హిట్ కొట్టిన ఈజోడీ `మెర్స‌ల్‌`తో మ‌రో సంచ‌ల‌న విజ‌యం అందుకున్నారు. `మెర్స‌ల్` త‌మిళ బాక్సాఫీస్ వ‌ద్ద దాదాపు 200 కోట్లు వ‌సూలు చేసింది. ఆ సినిమా తెలుగు అనువాదం బాగానే క‌లెక్ట్ చేసింది. అందుకే ఇప్పుడు విజ‌య్ - అట్లీ కాంబినేష‌న్‌ లో మ‌రో సినిమా అన‌గానే అంద‌రిలోనూ ఒక‌టే ఆస‌క్తి నెల‌కొంది. ఈ కాంబో హ్యాట్రిక్ పై క‌న్నేశారా? అంటూ ఆస‌క్తిక‌ర చ‌ర్చ సాగుతోంది. `మెర్స‌ల్` త‌ర్వాత విజ‌య్ మార్కెట్ తెలుగులోనూ పెరిగింది. ఆ సినిమా త‌ర్వాత‌ అట్లీ ఇప్ప‌టివ‌ర‌కూ వేరొక సినిమాకి క‌మిట‌వ్వ‌లేదు. దీంతో అత‌డు మ‌రోసారి విజ‌య్ కోసమే వేచి చూస్తున్నాడ‌ని ఇటీవ‌ల త‌మిళ మీడియాలో ప్ర‌చార‌మైంది.

ఈ విష‌యాన్ని స‌మంత లైవ్‌ లో ఉన్న ఓ టీవీ చానెల్‌ కి ఫోన్ చేసిన అట్లీని యాంక‌ర్ నేరుగా ఇదే విష‌య‌మై ప్ర‌శ్నించింది. మీరు తెరకెక్కించే త‌ర్వాతి సినిమా హీరో ఎవ‌రు? అని ప్ర‌శ్నిస్తే `సంథింగ్ స్పెష‌ల్ హీరో` అంటూ అట్లీ మాట దాట‌వేశాడు. ఆ త‌ర్వాత మ‌రోసారి యాంక‌ర్ రెట్టిస్తూ ఆ హీరో విజ‌య్ అని మాకు తెలుసులే అని అంది. దీంతో అట్లీ న‌వ్వేస్తూ `ఎస్ నిజ‌మే` అనేశాడు. దీంతో విజ‌య్ అభిమానుల‌కు ఫుల్ క్లారిటీ వ‌చ్చేసింది. ఇప్ప‌టికే అట్లీ విజ‌య్‌ కి లైన్ చెప్పి క‌థ డెవ‌ల‌ప్ చేసే ప‌నిలో ఉన్నాడు. మ‌రోవైపు విజ‌య్ - మురుగ‌దాస్ కాంబినేష‌న్ మూవీ `సర్కార్‌` రిలీజ్‌ కి వ‌స్తోంది. త‌దుప‌రి అట్లీ- విజ‌య్ సినిమా ఉంటుంది.

ఈ ప‌రిణామం నేప‌థ్యంలోనే టాలీవుడ్ స్టార్ ప్రొడ్యూస‌ర్ అశ్వ‌నిద‌త్ అట్లీతో ఓ భారీ చిత్రం తీస్తున్నాన‌ని ప్ర‌క‌టించిన సంగ‌తి తెలిసిందే. అది ఈ హ్యాట్రిక్‌ సినిమాయేనా? అంటూ ప్ర‌స్తుతం ఆస‌క్తిక‌ర చ‌ర్చ సాగుతోంది. అట్లీతో సినిమా ఉంటుంద‌ని ద‌త్ ఇదివ‌ర‌కూ చాలాసార్లు చెప్పారు. నిన్న `దేవ‌దాస్` ప్ర‌మోష‌న‌ల్‌ ఇంట‌ర్వ్యూలోనూ దానిని క‌న్ఫామ్ చేశారు. అందుకే ఇల‌య‌ద‌ళ‌ప‌తి విజ‌య్‌- అట్లీ కాంబినేష‌న్ ప్ర‌తిష్ఠాత్మ‌క చిత్రాన్ని వైజ‌యంతి మూవీస్ అధినేత నిర్మించ‌నున్నారా? అంటూ ఆస‌క్తిక‌ర చ‌ర్చ మొద‌లైంది.