'కార్తికేయ 2'లో స్వాతిరెడ్డి ఉన్నట్టా? లేనట్టా?

నిఖిల్ కథానాయకుడిగా చందూ మొండేటి దర్శకత్వంలో రూపొందిన 'కార్తికేయ' 2014లో ప్రేక్షకుల ముందుకు వచ్చింది. సుబ్రమణ్యస్వామి ఆలయం చుట్టూ అల్లుకున్న కథతో నడిచిన ఈ సినిమాలో స్వాతిరెడ్డి కథానాయికగా అలరించింది. కథాకథనాల పరంగా .. చిత్రీకరణ పరంగా .. సంగీతం పరంగా ఈ సినిమా అన్నివర్గాల ప్రేక్షకులను ఆకట్టుకుంది. విడుదలైన ప్రతి ప్రాంతంలోను భారీ వసూళ్లతో అనూహ్యమైన విజయాన్ని నమోదు చేసింది. నిఖిల్ - స్వాతి కెరియర్లోనే చెప్పుకోదగిన సినిమాగా నిలిచింది.


అలాంటి ఈ సినిమాకి సీక్వెల్ చేయడానికి లాక్ డౌన్ కి ముందే ప్రయత్నాలు జరిగాయి. లాక్ డౌన్ కారణంగా రెగ్యులర్ షూటింగ్ మొదలుపెట్టకుండానే ఆగిపోయింది. మళ్లీ ఇటీవలే ఈ ప్రాజెక్టులో కదలిక మొదలైంది. గుజరాత్ ప్రాంతంలో షూటింగ్ జరపడానికి సన్నాహాలు చేస్తున్నారనే వార్తలు వచ్చాయి. అయితే 'కార్తికేయ' సినిమాలో కథానాయికగా మెప్పించిన స్వాతి, వివాహమైన తరువాత సినిమాలకి దూరంగా ఉంటూ వస్తోంది. ఆమె ఈ సినిమాలో ఒక కీలకమైన పాత్రలో కనిపించనుందనే టాక్, సీక్వెల్ మొదలుపెట్టిన రోజుల్లోనే వచ్చింది. ఇక ప్రధాన కథానాయికగా అనుపమ పరమేశ్వరన్ అలరించనుందనే వార్తలు షికారు చేశాయి.


అయితే 'కార్తికేయ 2' ప్రాజెక్టులో కదలిక మొదలుకావడంతో, మళ్లీ ఇప్పుడు ఈ విషయంపైనే అందరిలో ఆసక్తి మొదలైంది. ఆల్రెడీ నిఖిల్ జోడిగా '18 పేజెస్'లో నటిస్తున్న అనుపమ పరమేశ్వరన్, 'కార్తికేయ 2'లోను నటించనుందా? చందూ మొండేటి - నిఖిల్ రిక్వెస్ట్ మేరకు స్వాతి ఈ సినిమాలో కీలకమైన పాత్రలో కనిపించనుందా? అనే విషయంలో క్లారిటీ రావాలసి ఉంది. ఈ సినిమాలో ప్రత్యేక పాత్రలో స్వాతి నటించే అవకాశాలు తక్కువనీ, నిఖిల్ సరసన నాయికగా ప్రియాంక అరుళ్ మోహన్ కనిపించే అవకాశాలు ఎక్కువనే టాక్ ఫిల్మ్ నగర్లో వినిపిస్తోంది. అసలు విషయమేమిటనేది త్వరలోనే తేలే అవకాశం ఉంది.