ప్రొడ్యూసర్ అవతారమెత్తిన స్టార్ డైరెక్టర్!

అట్లీ కుమార్... శంకర్ - మురగదాస్ లాంటి స్టార్ డైరెక్టర్ల దగ్గర అసిస్టెంట్ డైరెక్టర్ గా పనిచేసిన 'రాజారాణి' సినిమాతో డైరెక్టర్ గా పరిచయమయ్యాడు. అతి తక్కువ సమయంలోనే గురువులకు పోటీగా ఎదిగాడు. పోలీసోడు - అదిరింది - విజిల్ లాంటి డబ్బింగ్ చిత్రాలతో తెలుగు ప్రేక్షకులు కూడా తనవైపు చూసేలా చేసుకున్నాడు. ఈ సినిమాలు బాక్సఆఫీసు వద్ద భారీ కలెక్షన్స్ వసూలు చేసాయి. చేసింది నాలుగు సినిమాలే అయినా ప్రేక్షకుల నాడి పట్టుకుని తనదైన స్టైల్ లో టాప్ డైరెక్టర్ స్థాయికి ఎదిగాడు అట్లీ. రాజమౌళి - కొరటాల శివ - అనిల్ రావిపూడి తరహాలో తమిళ్ లో అపజయం ఎరుగని దర్శకుడిగా తనకంటూ ఓ గుర్తింపు తెచ్చుకున్నాడు. ప్రస్తుతం ఈ యువ సంచలన దర్శకుడు తన తదుపరి చిత్రాన్ని బాలీవుడ్ బాద్షా షారుక్ ఖాన్ తో సినిమా చేస్తున్నాడు. అయితే ఇప్పుడు డైరెక్టర్ అట్లీ కుమార్ ప్రొడ్యూసర్ గా మారుతున్నాడు.

'ఏ ఫర్ ఆపిల్ ప్రొడక్షన్స్' అనే పేరుతో నిర్మాణ సంస్థని స్టార్ట్ చేసి సినిమాలను నిర్మించనున్నాడు అట్లీ. ఈ ప్రొడక్షన్ హౌస్ లో ఫస్ట్ సినిమాగా 'సంగాలి బెంగాలీ కధావ తోరా' అనే రొమాంటిక్ ఎంటర్టైనర్ నిర్మిస్తున్నాడు. ఈ సినిమాలో 'రంగం' ఫేమ్ జీవా హీరోగా నటిస్తుండగా తెలుగమ్మాయి శ్రీ దివ్య హీరోయిన్ గా నటిస్తోంది. అంతేకాకుండా ప్యాషన్ స్టూడియోస్ ప్రొడక్షన్స్ తో కలిసి ఒక ఇంటరెస్టింగ్ యాక్షన్ థ్రిల్లర్ నిర్మించబోతున్నాడని సమాచారం. ఈ సినిమాకి సంబందించిన పూర్తి వివరాలు త్వరలో వెల్లడికానున్నాయి. డైరెక్టర్ గా సక్సెస్ అయిన అట్లీ ప్రొడ్యూసర్ గా సక్సెస్ అవుతాడేమో చూడాలి. ఇదిలా ఉండగా అట్లీ త్వరలోనే తెలుగులో కూడా డైరెక్ట్ తెలుగు సినిమా చేయడానికి ఆసక్తి కనబరుస్తున్నాడు. షారుక్ ఖాన్ సినిమా - విజయ్ తో సినిమా చేసిన అనంతరం తెలుగులో సినిమా చేసే అవకాశాలున్నాయి.