షారుఖ్ తో అట్లీ మూవీ.. పట్టాలెక్కేది అప్పుడేనా??

కోలీవుడ్ యంగ్ డైరెక్టర్ అట్లీ కుమార్.. గురించి దక్షిణాది ప్రేక్షకులకు పెద్దగా పరిచయం చేయాల్సిన అవసరం లేదు. ఎందుకంటే అట్లీ రూపొందించిన సినిమాలే అతని పేరును గుర్తుంచుకునేలా చేసాయి. 2013లో రాజారాణి మూవీతో దర్శకుడుగా మారిన అట్లీ.. ఆ తర్వాత పోలీసోడు, అదిరింది, విజిల్ సినిమాలు తెరకెక్కించి అభిమానులతో థియేటర్లలో విజిల్స్ వేయించాడు. అట్లీ నుండి 2019లో విజిల్ మూవీ చివరిగా విడుదలైంది. అప్పటినుండి అట్లీ తదుపరి సినిమా ఏదనేది ఇంకా చర్చలు జరుగుతూనే ఉన్నాయి. అట్లీ నుండి సినిమా వచ్చి దాదాపు రెండేళ్లు కావస్తుంది. అయితే తాజాగా బాలీవుడ్ బాద్షాతో సినిమా సెట్ చేసుకున్నట్లు తెలుస్తుంది.

ఈ రెండేళ్ల గ్యాప్ లో ఓ అద్భుతమైన స్క్రిప్ట్ రెడీ చేసుకున్నాడని తమిళ ఇండస్ట్రీలో టాక్. బాలీవుడ్ సూపర్ స్టార్ షారుఖ్ ఖాన్.. ఈసారి మొదటిసారి కెరీర్ పరంగా ఎక్కువ విరామం తీసుకున్నాడు. ప్రస్తుతం షారుఖ్.. సిద్ధార్థ్ ఆనంద్ దర్శకత్వంలో పఠాన్ సినిమా చేస్తున్నాడు. ఈ చిత్రం వచ్చే ఏడాది విడుదల కాబోతుంది. అయితే షారుఖ్ తన రాబోయే సినిమాలకోసం టాప్ డైరెక్టర్ రాజ్‌కుమార్ హిరానీతో పాటు అట్లీతో కూడా చర్చలు జరుపుతున్నట్లు తెలుస్తుంది. అయితే ఇంకా అధికారిక న్యూస్ బయటికి రాలేదుగాని షారుఖ్ అట్లీతో సినిమా చేసేందుకు ఆమోదం తెలిపినట్లు బాలీవుడ్ వర్గాల సమాచారం. ఈ సినిమా ఈ ఏడాది చివరి నుండి మొదలు కాబోతుందట.

తాజా సమాచారం ప్రకారం.. షారుఖ్ తో అట్లీ మూవీ యాక్షన్ ఎంటర్టైనర్ గా రూపొందనుందట. ఈ సినిమాలో షారుఖ్ డ్యూయెల్ రోల్ పోషించనున్నట్లు బజ్. అట్లీ ప్రస్తుతం ప్రీ-ప్రొడక్షన్ పనుల్లో బిజీగా ఉన్నాడట. అయితే షారుఖ్ ఈ సినిమాలో ఒక పాత్రలో దర్యాప్తు అధికారిగా.. మరోపాత్రలో మోస్ట్ వాంటెడ్ క్రిమినల్ గా కనిపిస్తాడని ఇండస్ట్రీ వర్గాలలో వార్తలు వైరల్ అవుతున్నాయి. ప్రస్తుతం షారుఖ్ - హిరాని ప్రాజెక్ట్ పట్టాలెక్కేలా కనిపించడం లేదట. నిజానికి షారుఖ్ తో సినిమా చేయడానికి అట్లీ రెండేళ్లుగా ఎదురు చూస్తున్నాడు. మరి త్వరలోనే అధికారిక న్యూస్ రానుందేమో చూడాలి.