అవసరాల నాని.. స్టోరీ మారిపోయిందట

దర్శకుడిగా మొదటి రెండు సినిమాలతోను సక్సెస్ సాధించిన శ్రీనివాస్ అవసరాలకు.. ఇప్పుడు బోలెడన్ని ప్రశంసలు వస్తున్నాయి. తెలుగుదనంతో కన్విన్సింగ్ గా స్క్రిప్ట్ లు రూపొందించడంతో.. టాలీవుడ్ లో ఓ కొత్త జోనర్ స్టార్ట్ చేశాడని కూడా పొగిడేస్తున్నారు. ఇప్పటికే ఈ దర్శకుడు నేచురల్ స్టార్ నానితో.. తన మూడో మూవీ ఉంటుందని చెప్పేశాడు కూడా. వచ్చే ఏడాది ప్రారంభం కానున్న ఈ సినిమాపై.. కొత్త సంగతులు చెప్పాడు శ్రీనివాస్ అవసరాల.

'జెంటిల్మన్ చిత్రం షూటింగ్ టైంలో నానికి ఓ స్టోరీ చెప్పాను. ఫన్నీగా సాగే ఈ స్టోరీ ఇద్దరికీ నచ్చింది. బాక్సాఫీస్ దగ్గర కూడా వర్కవుట్ అవుతుందని అనిపించింది. అయితే.. జెంటిల్మన్ లో నాని కొత్త యాంగిల్ చూపించేశాడు. దాంతో.. నా స్క్రిప్ట్ నాకు ఏ మాత్రం ఎక్సైట్ మెంట్ ఇవ్వలేదు. అందుకే పక్కన పెట్టేయాల్సి వచ్చేసింది. నానిలోని మరో కోణాన్ని.. అతని సత్తాని చూపించాలని కోరుకుంటున్నా. ఓ డిఫరెంట్ జోనర్ ని టచ్ చేసే ఛాన్స్ ఉంది' అని చెప్పాడు జ్యో అచ్యుతానంద దర్శకుడు.

సినిమాకి బిగినింగ్ ని అనుకుని.. క్లైమాక్స్ ని ముందే ఫిక్స్ కాకపోతే తెగ థ్రిల్లింగ్ గా ఉంటుందని చెప్పిన అవసరాల.. తన తొలి సినిమా ఊహలు గుసగుసలాడేకి ఇదే జరిగిందని అన్నాడు. ఇప్పటికీ ఆ మూవీ క్లైమాక్స్ విషయంలో నిర్మాత సాయి కొర్రపాటికి అసంతృప్తి ఉందని చెప్పడం హైలైట్.