సంచలనంగా మారిన అవతార్ 2 ఫస్ట్ డే కలెక్షన్ లెక్క ఇదే

ప్రతి ఫ్రేమ్ లోనూ సరికొత్త విస్మయానికి గురి చేసేలా.. విజువల్ వండర్ అన్న మాటకు అర్తం చెప్పేలా ఉంది అవతార్ 2. భారీ అంచనాల తర్వాత మొదటి భాగం విడుదలైన పదమూఢేళ్ల తర్వాత విడుదలైన ఈ భారీ బడ్జెట్ మూవీ.. రిలీజ్ కు ముందు క్రియేట్ చేసిన బజ్ అంతా ఇంతా కాదు. ఇంత హడావుడి జరిగిన తర్వాత విడుదలైన అవతార్ 2 కలెక్షన్ల పరంగా ఒక రికార్డును బ్రేక్ చేయలేకపోవటం గమనార్హం. విజువల్ వండర్ గా అందరి మనసుల్ని దోచుకున్న ఈ మూవీకి భారీ కలెక్షన్లను సాధించటంలో మాత్రం వెనుకపడిపోయింది.

దేశంలో ఇంగ్లీష్ తో పాటు పలు ప్రాంతీయ భాషల్లోనూ అవతార్ : ది వే ఆఫ్ వాటర్ విడుదలైంది. చిత్రపరిశ్రమ నుంచి అందుతున్న లెక్కల ప్రకారం ఈ మూవీ తొలి రోజు రూ.38 కోట్ల నుంచి రూ.40 కోట్ల మధ్య వసూళ్లను మాత్రమే అందుకుంది. అయితే.. బాక్సాఫీస్ ను శాసించే బాలీవుడ్ భారీ బడ్జెట్ సినిమాలు సైతం ఇప్పుడు కలెక్షన్ల కోసం కిందా మీదా పడుతున్న వేళ.. ఈ వసూళ్లు బాగానే ఉన్నట్లు కనిపించినా.. కరోనాకు ముందు విడుదలైన క్రేజీ మూవీ అవెంజర్స్ ది ఎండ్ గేమ్ మొదటి రోజు వసూళ్ల రికార్డును మాత్రం సాధించకపోవటం గమనార్హం.

2019లో వచ్చిన అవెంజర్స్.. ది ఎండ్ గేమ్ మూవీ అప్పట్లో మొదటి రోజున రూ.53 కోట్ల వసూళ్లను సొంతం చేసుకొని రికార్డును క్రియేట్ చేసింది. నిజానికి 2019లో ఉన్న టికెట్ల ధరలతో పోలిస్తే.. తాజాగా ఉన్నటికెట్ల ధరలు భారీగా పెరగటం మర్చిపోకూడదు. ఆ లెక్కన చూసినా.. అవెంజర్స్ ది ఎండ్ గేమ్ తో పోలిస్తే అవతార్ 2 భారీగా వెనుకపడినట్లుగా చెప్పాలి. నిజానికి ఈ మూవీకి భారీ హైప్ క్రియేట్ వచ్చినప్పటికీ.. కరోనాకు ముందు ఉన్నట్లుగా సినిమాల విషయంలో ప్రేక్షకుల దృష్టి కోణం మారిన విషయాన్ని మర్చిపోకూడదు.

నిజానికి అవతార్ 2 లాంటి మూవీస్ ను బుల్లితెర మీద చూడటంలో అర్థం లేదు. ఎందుకంటే.. ఇలాంటి సినిమాలు వెండితెర మీద అందునా త్రీడీ.. ఫోర్ డీలోనూ.. ఐమాక్స్ ప్రింట్ లోనూ చూస్తే.. ఆ మజానే వేరుగా ఉంటుంది. నిజానికి ఈ మూవీ 2డీతో పోలిస్తే.. త్రీడీ.. ఫోర్ డీ విషయంలో ప్రేక్షకుల ఆసక్తి ఎక్కువగా ఉన్నట్లు చెబుతున్నారు. ఏమైనా అవతార్ 2 ఇండియా డే వన్ వసూళ్లు రూ.40 (గ్రాస్) కోట్లు దాటలేకపోయినట్లుగా చెప్పక తప్పదు.