'అవతార్‌' కు కొద్ది దూరంలో..

ప్రపంచ వ్యాప్తంగా అత్యంత ఉత్కంఠ మద్య విడుదలైన 'అవెంజర్స్‌ : ఎండ్‌ గేమ్‌' చిత్రం రికార్డు వసూళ్లను నమోదు చేయడం ఖాయం అని, ప్రపంచ రికార్డులను ఈ చిత్రం బద్దలు కొడుతుందని అంతా భావించారు. 'అవతార్‌' చిత్రం ఇప్పటి వరకు ప్రపంచంలోనే అత్యధిక వసూళ్లు దక్కించుకున్న చిత్రంగా నిలిచింది. అలాంటి సినిమా రికార్డును ఇప్పటి వరకు ఏ సినిమా కూడా క్రాస్‌ చేయలేక పోయింది. అయితే ఆ రికార్డును ఎండ్‌ గేమ్‌ తప్పకుండా క్రాస్‌ చేస్తుందని భావించారు. కాని అనూహ్యంగా ఎండ్‌ గేమ్‌ కూడా అవతార్‌ రికార్డ్‌ కు కొద్ది దూరంలో ఆగేలా ఉంది.

10 సంవత్సరాల క్రితం వచ్చిన అవతార్‌ చిత్రం అప్పట్లో 2.79 బిలియన్‌ డాలర్లను వసూళ్లు చేసింది. అయితే ఆ తర్వాత ఏ సినిమా కూడా కనీసం రెండు బిలియన్‌ ల డాలర్లను అయినా వసూళ్లు చేయలేక పోయింది. అయితే ఎండ్‌ గేమ్‌ మాత్రం రెండు బిలియన్‌ డాలర్లను క్రాస్‌ చేసి ఇప్పటి వరకు 2.5 బిలియన్‌ డాలర్లను వసూళ్లు చేసింది. ఇప్పటికే 'టైటానిక్‌' రికార్డును బ్రేక్‌ చేసిన ఈ చిత్రం అవతార్‌ రికార్డుకు చేరాలంటే మాత్రం కష్టంగానే ఉంది.

ఇప్పటికే సినిమా వసూళ్లు చాలా తగ్గాయి. దాదాపు మూడు వారాలు పూర్తి చేసుకున్న తర్వాత ఇంకా 0.29 బిలియన్‌ డాలర్లను వసూళు చేయాల్సి ఉంది. అయితే ఇప్పుడు ఇంకా అంత రాబట్టడం అసాధ్యం అంటూ విశ్లేషకులు చెబుతున్నారు. అవతార్‌ కు చాలా క్లోజ్‌ గా వచ్చి ఎండ్‌ గేమ్‌ కలెక్షన్స్‌ ఎండ్‌ అయ్యే అవకాశం ఉంది. ఆ స్థాయికి చేరడం అంటే కూడా మామూలు విషయం కాదు.