యంగ్ హీరోతో మరోసారి జోడీకడుతున్న అవికా గోర్!

అవికా గోర్ పేరు వినగానే పొద్దుతిరుగుడు పువ్వు వంటి అందమైన ఫేస్ కళ్లముందు కదలాడుతుంది. చక్కని కనుముక్కుతీరు ఈ పిల్ల సొంతం. కనుబొమల కలయిక ఆ పిల్ల ఫేస్ కి ప్రత్యేకమైన ఆకర్షణ. చిన్నప్పటి నుంచే బుల్లితెరపై క్రేజ్ పెంచుకుంటూ వచ్చిన ఈ అమ్మాయి, టీనేజ్ లో 'ఉయ్యాలా జంపాలా' సినిమాతో తెలుగు తెరకి పరిచయమైంది. ఈ సినిమాలో పల్లెటూరి పిల్లగా ఉమాదేవి పాత్రలో అదరగొట్టేసింది. దాంతో ఈ అమ్మాయిని వెతుక్కుంటూ వరుసగా అవకాశాలు వచ్చాయి.

ఆ తరువాత అవికా చేసిన 'సినిమా చూపిస్త మావ' .. ' ఎక్కడికి పోతావు చిన్నవాడా' సినిమాలు ఆమె క్రేజ్ ను మరింత పెంచాయి. యూత్ లో ఈ పిల్లకి ఒక రేంజ్ లో ఫాలోయింగ్ పెరిగిపోయింది. ఇక యంగ్ హీరోయిన్ గా ఈ అమ్మాయి హవా మొదలవుతుందని అంతా అనుకున్నారు. కానీ అందుకు భిన్నంగా ఈ అమ్మాయి మంచి డిమాండ్ ఉన్న సమయంలో తెలుగు తెరకి దూరమైంది. ఆ తరువాత 'రాజుగారి గది 3' సినిమాకి మనసు మార్చుకున్నా ప్రయోజనం లేకుండా పోయింది. మళ్లీ ఇప్పుడిప్పుడే టాలీవుడ్లో ఈ పిల్ల పేరు వినిపిస్తోంది.

చిరంజీవి చిన్నల్లుడు కల్యాణ్ దేవ్ కొత్త ప్రాజెక్టులను ఒక్కోక్కటిగా లైన్లో పెట్టే పనిలో ఉన్నాడు. వాటిలో ఒక ప్రాజెక్టులో కథానాయికగా అవికా చేయనుంది. ఇక మరో సినిమాను రాజ్ తరుణ్ తో చేయనుంది. తాజాగా తన ఫాలోవర్స్ తో చాటింగ్ చేస్తూ రాజ్ తరుణ్ ఈ విషయం చెప్పాడు. అవికా తన బెస్ట్ ఫ్రెండ్ అనీ .. త్వరలోనే ఆమెతో ఒక సినిమా ఉంటుందని అన్నాడు. అంటే ఈ ఇద్దరి కాంబినేషన్లో మూడో సినిమా రానుందన్న మాట. ఈ సినిమాతో ఈ కుర్రజోడీ హ్యాట్రిక్ హిట్ కొడుతుందేమో చూడాలి.