నెక్స్ట్ సల్మాన్ ఖాన్ అనేస్తున్నారే..

గత కొన్నేళ్లలో బాలీవుడ్ హీరోల తీరు మారిపోయింది. ఒకప్పుడు మాస్ మసాలా.. యాక్షన్ సినిమాలు చేసిన వాళ్లందరూ రూటు మార్చుశారు. అమీర్ ఖాన్ పూర్తిగా క్లాస్ సినిమాలకు పరిమితం అయిపోయాడు. షారుఖ్ కూడా కొత్త దారిలో వెళ్లే ప్రయత్నం చేస్తున్నాడు. యాక్షన్ హీరోగా గుర్తింపున్న అక్షయ్ కుమార్ పూర్తిగా వేరే రూట్లో వెళ్తున్నాడు. ఐతే ఒక్క సల్మాన్ ఖాన్ మాత్రమే అప్పుడప్పుడూ అయినా మాస్ సినిమాలు చేస్తూ ఆ వర్గం ప్రేక్షకుల్ని అలరిస్తున్నాడు. ఇప్పుడు అతడిలాగే మరో యువ కథానాయకుడు మాస్ హీరోగా అవతరించాడంటున్నారు అక్కడి ట్రేడ్ పండిట్లు. ఆ హీరో ఎవరో కాదు.. టైగర్ ష్రాఫ్.

గత శుక్రవారమే ‘బాఘి-2’తో ప్రేక్షకుల్ని పలకరించాడు టైగర్ ష్రాఫ్. ఈ సినిమాకు వస్తున్న ఓపెనింగ్స్ చూసి జనాలకు మతి పోతోంది. తొలి రోజే రూ.25 కోట్ల గ్రాస్ వసూలు చేసిన ‘బాఘి-2’.. శనివారం రూ.20.4 కోట్లు.. ఆదివారం రూ.27.6 కోట్లు కొల్లగొట్టింది. వారాంతంలోనే రూ.73 కోట్లకు పైగా గ్రాస్ వచ్చింది. మామూలుగా అమీర్ ఖాన్.. సల్మాన్ లాంటి హీరోలకు మాత్రం ఈ స్థాయిలో ఓపెనింగ్స్ వస్తుంటాయి. తెలుగు హిట్ మూవీ ‘క్షణం’కు రీమేక్ గా తెరకెక్కిన ‘బాఘి-2’ హిందీలో పూర్తి భిన్నంగా తయారైంది. దీన్ని పూర్తి స్థాయి యాక్షన్ సినిమాగా మలిచాడు అహ్మద్ ఖాన్. దీనికి రివ్యూలేమంత గొప్పగా లేకపోయినా.. మాస్ ప్రేక్షకుల్ని ఉర్రూతలూగిస్తోంది. టైగర్ ఫాలోయింగ్.. బాక్సాఫీస్ స్టామినా చూసి ట్రేడ్ పండిట్లు కూడా ఆశ్చర్యపోతున్నారు. అతడిని ఈ తరం సల్మాన్ ఖాన్ అని పొగిడేస్తున్నారు.