బాహుబలి సునామీ డీజేకి తాకిందా

బాహుబలి ది కంక్లూజన్ ట్రైలర్ ఆన్ లైన్ లో సెన్సేషన్స్ సృష్టించేస్తోంది. విడుదలైన 24 గంటల్లోనే నాలుగు భాషల్లో కలిపి ఈ ట్రైలర్ 5కోట్ల వ్యూస్ దాటిపోయాయంటే.. ఈ సునామీ ఏ రేంజ్ లో ఉందో.. జనాలకు ఈ సినిమా కోసం ఏ స్థాయిలో ఎదురుచూస్తున్నారో అర్ధమవుతుంది. బాహుబలి2 కి కనిపిస్తున్న డిమాండ్ ఇతర మూవీ మేకర్స్ ను ఆలోచనలో పడేస్తోంది.

ముఖ్యంగా సమ్మర్ రిలీజ్ కి షెడ్యూల్ చేసిన సినిమాలపై ఎఫెక్ట్ గట్టిగానే ఉంది. ముందు రిలీజ్ అయ్యే సినిమాలకు పెద్దగా ఇబ్బంది లేకపోయినా.. బాహుబలి2 తర్వాత వచ్చే సినిమాలపై మాత్రం ఈ ఎఫెక్ట్ కచ్చితంగా ఉంటుంది. అల్లు అర్జున్ నటిస్తున్న డీజే-దువ్వాడ జగన్నాధం మూవీని పోస్ట్ పోన్ చేయాలని భావిస్తున్నట్లు చెబుతున్నారు. నిజానికి ఈ చిత్రాన్ని.. ఏప్రిల్ తొలివారంలోనే రిలీజ్ చేయాలని అనుకున్నారు. కానీ పవన్ కళ్యాణ్ కాటమరాయుడు మార్చ్ చివరి వారానికి షెడ్యూల్ చేయడంతో.. మే నెలకు పోస్ట్ పోన్ అయింది డీజే. మే 6న దువ్వాడ జగన్నాధంను థియేటర్లలోకి రావాలన్నది మేకర్స్ యోచన.

అయితే.. ఇప్పుడీ డేట్ ఏ మాత్రం సరికాదనే ఫీలింగ్ కి వచ్చేశారట. బాహుబలి2 చిత్రానికి వారం.. రెండు వారాల గ్యాప్ లో రావడం అంత మంచిది కాదని భావిస్తున్నారట. అప్పటికి కూడా బాహుబలి2 హంగామా తగ్గకపోవచ్చని వారి ఉద్దేశ్యం. మే నెలాఖరు నాటికి డీజే ను సిద్ధం చేయాలని చూస్తున్నట్లు టాలీవుడ్ టాక్.

Like Us on Facebook : https://www.facebook.com/Tupakidotcom/