ట్రైలర్ టాక్: అంతకు మించేలా బాహుబలి 2

ఇప్పుడు అందరి కళ్ళూ బాహుబలి 2 ట్రైలర్ పూనే ఉన్నాయి. ఈరోజు ఉదయం నుండి బాహుబలి 2 ట్రైలర్ తెలుగు రాష్ట్రాల్లో చాలా ధియేటర్లలో ప్రదర్శితం అవుతోంది. అయితే యుట్యూబ్లో మాత్రం సాయంత్రానికి ఈ ట్రైలర్ వస్తుంది. ఇకపోతే అసలు ఈ ట్రైలర్ ఎలా ఉందో చూద్దాం పదండి.

నిజంగానే బాహుబలి 1 కు మించిపోయేలా ఉంది బాహుబలి 2 ట్రైలర్. ఇప్పటివరకు మనోళ్ళు తొలిపార్టులో చెప్పని కథను అంతా కూడా.. 2వ పార్టులో చెబుతున్నారని అనిపిస్తోంది. ముఖ్యంగా అమరేంద్ర బాహుబలి రక్తం సాక్షిగా శపథం చేయడం.. దేవసేనతో ప్రేమలో పడటం.. మాహిష్మతి రాజ్యపు ఇతర లొకేషన్లు.. ఒళ్లు గగుర్పొడిచే ఫైటింగ్ సీక్వెన్సులూ.. అంతర్యుద్దమూ.. అబ్బో అన్నీ కూడా అదిరిపోయాయ్. చివరాకరగా.. తలనెరిసన భళ్ళాళదేవుడితో జూ.బాహుబలి అయిన శివుడు తలపడటమే సినిమా అన్నట్లు ట్రైలర్లో బాగా రక్తికట్టించారు. రాజమౌళి స్టయిల్లో అదిరిపోయింది అనే చెప్పాలి.

ఒకవేళ ట్రైలర్ పరంగా ఏదైనా పేర్లు పెట్టాల్సి వస్తే.. అక్కడక్కడా సన్నగిల్లిన గ్రాఫిక్స్ క్వాలిటీ.. అలాగే రాజుల కాలం నాటి సినిమాకు మ్యాచ్ అవ్వని రాక్ మ్యూజిక్ తో కంజోజ్ చేయబడిన కీరవాణి బ్యాగ్రౌండ్ స్కోర్.. అనే చెప్పాలి. ఇవి తప్పిస్తే తక్కినదంతా అమోఘం!!



Like Us on Facebook : https://www.facebook.com/Tupakidotcom/