2.20 నిమిషాల బాహుబలి2 ట్రైలర్

దేశవ్యాప్తంగా సినీ అభిమానులు ఎప్పుడెప్పుడా అని ఎదురుచూస్తోన్న ముహూర్తం మరి కొన్ని గంటల్లోనే వచ్చేస్తోంది. బాహుబలి2 ట్రైలర్ రిలీజ్ కు ఇంకొక్క రోజు మాత్రమే ఉంది. రేపు ఉదయాన్నే బాహుబలి ది కంక్లూజన్ ట్రైలర్ థియేటర్లలోకి వచ్చేయనుంది. అదేంటీ యూట్యూబ్ లో కదా అనుకోవచ్చు కానీ.. ఈ చిత్రం ప్రచారం కోసం బోలెడన్ని చిట్కాలు అనుసరిస్తున్న జక్కన్న.. 16వ తేదీ ఉదయం.. 9-10 గంటల మధ్యలో.. రెండు తెలుగు రాష్ట్రాల్లోని పలు థియేటర్లలో కూడా బాహుబలి ది కంక్లూజన్ ట్రైలర్ ను రిలీజ్ చేయబోతున్నాడు.

ఇప్పుడీ ట్రైలర్ కు సెన్సార్ కూడా చేయించేశారు. థియేటర్లలో.. టీవీల్లో టెలికాస్ట్ చేయాలంటే.. ట్రైలర్ అయినా సరే సెన్సార్ చేయించాల్సిందే. 2 నిమిషాల 20 సెకన్ల పాటు బాహుబలి ది కంక్లూజన్ ట్రైలర్ సాగనుంది. ట్రైలర్ నెంబర్ 1 అని సర్టిఫికేట్ వచ్చిందంటే.. సినిమా రిలీజ్ కు ముందు ఈ సినిమా కోసం కట్ చేసిన రెండో ట్రైలర్ ను.. విడుదల చేసే అవకాశాలు ఉన్నాయన్న మాట.

యుద్ధం నేపథ్యంతో తెరకెక్కించిన చిత్రం కావడంతో.. బాహుబలి2 ట్రైలర్ కు యూఏ సర్టిఫికేట్ లభించడంలో ఆశ్చర్యం లేదు. మరికొన్ని గంటలు ఆగితే.. యూట్యూబ్ లో బాహుబలి2 సెన్సేషన్స్ స్టార్ట్ అయిపోవడం ఖాయంగా కనిపిస్తోంది.

Like Us on Facebook : https://www.facebook.com/Tupakidotcom/