ఈ ద‌స‌రా బాహుబ‌లికి అంకితం

పండ‌గ‌లొచ్చాయ్ అంటే ఊళ్ల‌లో సంద‌డే సంద‌డి. ఎక్క‌డెక్క‌డినుంచో చుట్టాలు - ప‌క్కాలు - బంధుమిత్రులు అంతా ఇళ్ల‌కు చేరి సంద‌డి సంద‌డి చేసేస్తారు. ఉన్న వారం రోజుల్ని హ్యాపీగా సెల‌బ్రేట్ చేసుకుంటారు. ఈ పండ‌గ‌ల వేళ షాపింగులు - శికార్లు అదిరిపోతాయి. తెలుగువారి పండ‌గ‌లు ద‌స‌రా - దీపావ‌ళి - సంక్రాంతికి షాపింగ్ మాల్స్ కిట‌కిట‌లాడిపోతాయి. ఇదే అద‌నుగా మాల్స్‌ లో న‌యా ఆఫ‌ర్స్‌ తో జ‌నాల్ని ఆక‌ర్షించే ప‌థ‌కాలెన్నో ఉంటాయి. అంతే కాదండోయ్ .. ఈ సీజ‌న్‌ లో బుల్లితెర టీఆర్‌ పీలు పీక్స్‌ లో ఉంటాయి. ఇళ్ల‌లో ఒకేచోట గుమిగూడిన జ‌నాలంతా పోటీ ప‌డి మ‌రీ టీవీలు చూస్తుంటారు.

స‌రిగ్గా ఇలాంటి టైమ్ చూసి బాహుబ‌లి సినిమాని వ‌దిలేందుకు టీవీ చానెళ్లు రెడీ అవుతున్నాయి. బాహుబ‌లి ఇటు తెలుగు - అటు త‌మిళ్‌ - మ‌ల‌యాళం - క‌న్న‌డం - హిందీ .. అన్నిచోట్లా ప్ర‌భంజ‌నం సృష్టించింది. ముఖ్యంగా బాహుబ‌లి హిందీ వెర్ష‌న్ అసాధార‌ణ విజ‌యం సాధించింది. అందుకే అక్క‌డ సోనీ మ్యాక్స్‌ చానెల్ బాహుబ‌లి ప్రీమియ‌ర్ ని ద‌స‌రా పండ‌క్కి రెడీ చేస్తోంది. బుల్లి తెర టీఆర్‌ పీని లాగేయాల‌ని చూస్తోంది. అదే తీరుగా తెలుగు ప్రేక్ష‌కుల కు ఈ విజ‌య‌ద‌శ‌మికి వినోదాల విందు పంచేందుకు మాటీవీ రెడీ అవుతోంది. ముఖ్యంగా ద‌స‌రా (అక్టోబర్ 22 ) బాహుబ‌లి ప్రీమియ‌ర్ షోకి ప్లాన్ చేస్తున్నార‌ని స‌మాచారం. అంటే ప్ర‌పంచ వ్యాప్తంగా ఈ విజ‌య‌ద‌శ‌మి బాహుబ‌లికి అంకితం అయిన‌ట్టే. ఆరోజు బాహుబ‌లి ఫెస్టివ‌ల్ షురూ..