గూగుల్ సెర్చిలోనూ బాహుబలే

ఇప్పటికే లెక్కలేనన్ని రికార్డులు సొంతం చేసుకున్న బాహుబలి సినిమా ఇప్పుడు మరో రికార్డు సొంతం చేసుకుంది. తెలుగు సినీరంగంలోని పాత రికార్డులన్నీ చెరిపేసిన ఈ సినిమా బాలీవుడ్ లోనూ కలెక్షన్లు కొల్లగొట్టిన సంగతి తెలిసిందే. అంతేకాదు.... ఇంటర్నెట్ లోనూ బాహుబలి రికార్డులు సృష్టించింది. గూగుల్ సెర్చ్ లో అత్యధికులు వెతికిన లిస్టులో బాహుబలికి రెండో స్థానం దక్కడం విశేషం. అయితే... గూగుల్ సెర్చిలో బాహుబలిని మించిన సినిమా ఏదైనా ఉందా అంటీ అదే లేదు. బాహుబలి కంటే ముందున్నది ఐసీసీ వరల్డ్ కప్ 2015.. అవును గూగుల్ సెర్చిలో ఎక్కువ మంది క్రికెట్ వరల్డ్ కప్ కోసం వెతగ్గా ఆ తరువాత రెండో స్థానంలో బాహుబలి ఉంది. సినిమాల పరంగా చూస్తే బాహుబలిదే మొదటి స్తానం.

ఏటా గూగుల్ సెర్చిలో బాలీవుడ్ సినిమాలు ముందుంటాయి. కానీ, ఈసారి మాత్రం బాహుబలి దెబ్బకు అవేమీ కనిపించకుండా పోయాయి. బాహుబలి-1కే ఇంత ఆదరణ ఉండగా ఇక దానికి తీస్తున్న రెండో పార్టుకు మరెంత ఆదరణ వస్తుందో అన్నట్లుగా ఉంది. ప్రస్తుతం రామోజీ ఫిలింసిటీలో షూటింగు జరుగుతున్న బాహుబలి-2 సినిమాపైనా భారీ అంచనాలున్నాయి. 2016లో విడుదల కానున్న బాహుబలి-2 కోసం కూడా ఇప్పటి నుంచే గూగుల్ సెర్చిలో వెతుకులాట మొదలైంది. ఇక సినిమా గురించి ప్రచారం మొదలైతే గూగుల్ సెర్చి బార్ గడగడలాడాల్సిందేనేమో.