బాహుబలి సక్సెస్ ప్రభాస్ ది కాదన్నాడు

‘బాహుబలి’ సినిమాతో ప్రభాస్ ఇమేజే మారిపోయింది. అతను పాన్ ఇండియా స్టార్ అయిపోయాడు. ఈ సక్సెస్ ను చూపించి ఇండియాలో బిగ్గెస్ట్ స్టార్లలో అతనొకడని కీర్తిస్తున్నారు. ‘బాహుబలి’ విజయాన్ని అతడికి కట్టబెడుతున్నారు అభిమానులు. ఐతే బాలీవుడ్ స్టార్ డైరెక్టర్ రోహిత్ శెట్టి మాత్రం ఈ సక్సెస్ అతడిది కాదంటున్నాడు. స్క్రిప్టు వల్ల.. డైరెక్షన్ వల్ల ‘బాహుబలి’ ఇంత పెద్ద సక్సెస్ అయింది తప్ప ప్రభాస్ వల్ల కాదని ఆయన తేల్చేశాడు. ఇటీవలే ‘బాహుబలి: ది కంక్లూజన్’ సినిమా చూసిన రోహిత్.. ముంబయిలో జరిగిన ఓ ఈవెంట్లో ఈ సినిమా గురించి స్పందించాడు.

‘‘బాహుబలి-2 ఇంత పెద్ద సక్సెస్ అయిందంటే అది దర్శకుడి గొప్పదనం. ఆ స్క్రిప్టులో అంత బలముంది. ప్రభాస్ పాపులారిటీ వల్ల ఈ సినిమా హిట్టయిపోలేదు’’ అని రోహిత్ అన్నాడు. బాలీవుడ్ జనాలు సినిమాల ప్రమోషన్ల విషయంలో అనుసరించే స్ట్రాటజీల్ని మార్చుకోవాలని ‘బాహుబలి-2’ రుజువు చేసిందని రోహిత్ శెట్టి అభిప్రాయపడ్డాడు. ‘‘కేవలం ప్రమోషన్ల వల్ల సినిమాలు ఆడేయవు. మా బాలీవుడ్ వాళ్లు మామూలుగా ప్రమోషన్ల కోసం రియాల్టీ షోలకు వెళ్తుంటారు. షాపింగ్ మాల్స్ లో సందడి చేస్తుంటారు. ఇంకా ఎక్కడెక్కడికో తిరుగుతుంటారు. ఇవన్నీ ఏమీ అవసరం లేదని బాహుబలి-2 రుజవు చేసింది. సినిమాకు ఏం అవసరమో ఇది రుజువు చేసింది’’ అని రోహిత్ శెట్టి అన్నాడు. భవిష్యత్తులో కుదిరితే ప్రభాస్ తో సినిమా చేయాలని ఉందని రోహిత్ శెట్టి తన కోరికను వెల్లడించాడు.