జూనియర్ వదిలేశాడు.. వెంకీ పట్టేశాడు

విక్టరీ వెంకటేష్ హీరోగా మారుతి దర్శకత్వంలో రూపొందుతున్న బాబు బంగారం మూవీపై చాలానే కన్ఫ్యూజన్ నెలకొంది. ఆడియో రిలీజ్ పోస్ట్ పోన్ చేయడంతో.. అసలు సినిమానే కంప్లీట్ కాలేదనే టాక్ వచ్చేసింది. కొన్ని సీన్స్ కోసం హీరోయిన్ నయనతార డేట్స్ ఇవ్వడం లేదంటూ ప్రచారం జరిగింది. ఇప్పుడు వీటన్నిటికీ ఒకేసారి క్లారిటీ వచ్చేస్తోంది.

బాబు బంగారం చిత్రానికి ఈ నెల 24 ఆడియో రిలీజ్ చేస్తున్నట్లు అఫీషియల్ గా ప్రకటించేసింది యూనిట్. దీంతో వెంకీతో మారుతీ తీస్తున్న ఈ క్రేజీ ప్రాజెక్టుకు సంబంధించిన ఓ క్లారిటీ వచ్చింది. మరోవైపు.. రిలీజ్ పై కూడా స్పష్టత ఇచ్చేయడం విశేషం. ఆగస్ట్ 12న బాబు బంగారం విడుదల చేయాలని నిర్ణయించారు. నిజానికి బాబు బంగారం ఈ నెల 29నే విడుదల కావాల్సి ఉన్నా.. కబాలి కోసం ఆ డేట్ వదులుకోవాల్సి వచ్చింది. ఈ సమయంలో అసలు విడుదల తేదీ ఎప్పుడు సెట్ చేసుకోవాలని యూనిట్ తర్జన భర్జనలు జరిపారు.

అలాంటి సమయంలో జనతా గ్యారేజ్ విడుదలను పోస్ట్ పోన్ చేస్తున్నట్లు కొరటాల అండ్ టీం ప్రకటించడంతో.. ఇక వేరే ఆలోచన లేకుండా ఆగస్ట్ 12కి ఫిక్స్ అయిపోయింది బాబు బంగారం యూనిట్. ఈ సీజన్ లో ఆ డేట్ కి మించిన రిలీజ్ తేదీ మరొకటి దొరకదు. ఆగస్ట్ 15న కూడా పబ్లిక్ హాలిడే కావడంతో.. 4 రోజుల పాటు బంపర్ కలెక్షన్స్ రాబట్టుకునే ఛాన్స్ ఉంటుంది. అందుకే హడావిడిగా ఈ డేట్ కి ఫిక్స్ అయిపోయినట్లు టాక్‌.