ఈ వారం బాబు గోగినేని ఎలిమినేష‌న్?

బిగ్ బాస్ హౌస్ నుంచి ఎవ‌రు ఎలిమినేట్ అవుతున్నారో ఒక రోజు ముందుగానే సోష‌ల్ మీడియాలో లీక‌వుతోన్న సంగ‌తి తెలిసిందే. ఆదివారం ఎపిసోడ్ ను ఒక రోజు ముందుగానే షూట్ చేయ‌డం....అందులోనూ బిగ్ బాస్ సెట్లో ప‌నిచేసే వారు తెలుగువారు కావ‌డంతో ఈ లీకులు ఆగ‌డం లేదు. గ‌త 5 వారాలుగా ఎవ‌రు ఎలిమినేట్ అవుతున్నారో ఒక రోజు ముందుగానే ప్రేక్ష‌కుల‌కు తెలిసిపోవ‌డంతో ఆ కిక్కు మిస్స‌వుతోంది. కానీ, ఈ విష‌యంలో బిగ్ బాస్ కూడా ఏమీ చేయ‌లేని నిస్స‌హాయ స్థితిలో ఉన్నాడు. ఇదే క్ర‌మంలో, తాజాగా ఈ వారం బిగ్ బాస్ నుంచి ప్ర‌ముఖ హేతువాది బాబు గోగినేని ఎలిమినేట్ కాబోతున్న‌ట్లు సోషల్ మీడియాలో లీకులు మొద‌ల‌య్యాయి. దానికితోడు బాబు గోగినేనికి అతి త‌క్కువ ఓట్లు పోల్ కావ‌డంతో ఆయ‌న ఎలిమినేష‌న్ ఖాయ‌మ‌ని టాక్ వ‌స్తోంది.

ఈ వారం ఎలిమినేష‌న్ జోన్ లో శ్యామ‌ల‌ - గీతామాధురి - దీప్తి న‌ల్ల‌మోతు - గ‌ణేష్ - త‌నీష్ - బాబు గోగినేని ఉన్నారు. అయితే, వీరంద‌రిలోకి గోగినేనికి త‌క్కువ ఓట్లు పోల‌య్యాయి. దీంతో, ఆయ‌న ఎలిమినేష‌న్ ఖాయ‌మ‌ని ఊహాగానాలు వ‌స్తున్నాయి. దానికి తోడు, గ‌త రెండు వారాలుగా గోగినేని ప్ర‌వ‌ర్త‌న‌లో తేడా వ‌చ్చింది. కౌశ‌ల్ - గీతామాధురిల‌తో ఆయ‌న గొడ‌వ ప‌డ్డారు. దీంతో, వారి ఫ్యాన్స్ బాబుపై గుర్రుగా ఉన్నారు. దానికితోడు, గ‌త వారం కొన్ని టాస్క్ ల సంద‌ర్భంగా బాబు...క్రీడాస్ఫూర్తిని చూప‌లేదు. దీంతో,ఆయ‌న‌పై కొద్దిగా వ్య‌తిరేక‌త వ‌చ్చింది. అంతేకాకుండా, బిగ్ బాస్ నుంచి వెళ్లిపోవాల‌నుంది అని బాబు స్వ‌యంగా రెండు సంద‌ర్భాల్లో అన్నారు. వీట‌న్నింటినీ ప‌రిగ‌ణ‌లోకి తీసుకోవ‌డంతోపాటు...సోష‌ల్ మీడియాలో తాజాగా వ‌స్తోన్న లీకుల నేప‌థ్యంలో ఈ సారి బాబు గోగినేని వికెట్ ప‌డ‌డం ఖాయంగా క‌నిపిస్తోంది.