మెగా బ్రదర్స్ ను ఒకే వేదికపై చూడాలనుకున్న ఫ్యాన్స్ కి నిరాశే..!

మెగాస్టార్ చిరంజీవి నటించిన 'గాడ్ ఫాదర్' సినిమా విడుదలకు సిద్ధమైంది. దసరా సందర్భంగా థియేటర్లలోకి రాబోతున్న ఈ చిత్రానికి సంబంధించిన ప్రమోషన్స్ వేగవంతం చేస్తున్నారు. ఇందులో భాగంగా గ్రాండ్ గా ప్రీ రిలీజ్ ఈవెంట్స్ చేయడానికి మేకర్స్ ప్లాన్ చేసుకున్నారు.

'గాడ్ ఫాదర్' ప్రీ రిలీజ్ ఈవెంట్ ను ఆంధ్రప్రదేశ్ లోని అనంతపురంలో నిర్వహించనున్నారని తెలుస్తోంది. దీనికి చిరంజీవి సోదరుడు పవర్ స్టార్ పవన్ కళ్యాణ్ ముఖ్య అతిథిగా వస్తారని చాలా రోజులుగా ప్రచారం జరుగుతోంది.

పొలిటికల్ థ్రిల్లర్ కాబట్టి దీనికి జనసేన అధినేత పవన్ సరైన గెస్ట్ అని అభిమానులు భావించారు. అంతేకాదు చాలా కాలం తర్వాత మెగా బ్రదర్స్ ఇద్దరినీ ఒకే వేదిక మీద చూసే అవకాశం కలుగుతుందని ఆశ పడ్డారు. అయితే ఫ్యాన్స్ కి ఇప్పుడు నిరాశే ఎదురయ్యే పరిస్థితి వచ్చింది.

చిరంజీవి సినిమా వేడుకకు పవన్ కళ్యాణ్ ను చీఫ్ గెస్టుగా పిలవాలని మేకర్స్ కూడా భావించారట. కానీ పవన్ ప్రస్తుతం హైదరాబాద్ లో లేడు. విదేశీ పర్యటన కోసం అమెరికా వెళ్ళాడు. దసరా తరువాతే అక్కడి నుంచి తిరిగి వస్తారని సమాచారం. దీంతో అన్నయ్య సినిమా ఫంక్షన్ కు పవన్ వచ్చే అవకాశం లేకుండా పోయింది.

చిరంజీవి మరియ పవన్ కళ్యాణ్ లు కలిసి 'గాడ్ ఫాదర్' ఈవెంట్ లో సందడి చేస్తారని మెగా అభిమానులు అనుకున్నారు. కానీ ఇప్పుడు పవన్ యూఎస్ఏ వెళ్లడంతో ఫ్యాన్స్ అప్సెట్ అవ్వాల్సి వచ్చింది. అయితే మెగాస్టార్ చేతిలో మరో రెండు ప్రాజెక్ట్ ఉన్నాయి కాబట్టి.. ఆ సినిమాల వేడుకకైనా పవర్ స్టార్ ని గెస్టుగా పిలవాలని కోరుకుంటున్నారు.

ఇకపోతే 'గాడ్ ఫాదర్' ఈవెంట్ కు పవన్ కళ్యాణ్ వచ్చే అవకాశం లేదు కాబట్టి.. నిర్మాతల్లో ఒకరిగా వ్యవహరించిన మెగా పవర్ స్టార్ రామ్ చరణ్ ని తీసుకొస్తే బాగుంటుందని ఫ్యాన్స్ అభిప్రాయ పడుతున్నారు.

కాగా, 'గాడ్ ఫాదర్' సినిమాలో చిరంజీవి సాల్ట్ అండ్ పెప్పర్ లుక్ లో కనిపించనున్నారు. ఇందులో బాలీవుడ్ హీరో సల్మాన్ ఖాన్ కూడా కీలక పాత్రలో నటించారు. ఈ నేపథ్యంలో తెలుగుతో పాటుగా హిందీలోనూ ఈ చిత్రాన్ని గ్రాండ్ గా రిలీజ్ చేయడానికి మేకర్స్ ప్లాన్ చేశారు.

ఈ నేపథ్యంలో తెలుగు రాష్ట్రాలతో పాటుగా ముంబైలోనూ ఓ ఈవెంట్ ను ప్లాన్ చేస్తున్నట్లు తెలుస్తోంది. అలానే దుబాయ్‌ లో కూడా ఓ ఈవెంట్ చేయాలని ఆలోచిస్తున్నట్లు టాక్. ఈ వేడుకలకు చిరంజీవి మరియు సల్మాన్ హాజరయ్యే అవకాశం ఉంది.

రిలీజ్ డేట్ దగ్గర పడుతుండటంతో మేకర్స్ అగ్రిసివ్ గా ప్రమోషన్స్ చేయడానికి సన్నాహాలు చేసుకుంటున్నారు. ఇటీవల 'తార్ మార్' సాంగ్ ని రిలీజ్ చేయగా.. రాబోయే రోజుల్లో మరో మూడు పాటలు మరియు థియేట్రికల్ ట్రైలర్ ను లాంచ్ చేయనున్నారు.

'గాడ్ ఫాదర్' చిత్రంలో నయన తార - సత్యదేవ్ కీలక పాత్రలు పోషించారు. ఎస్ థమన్ సంగీతం సమకూర్చారు. కొణిదెల ప్రొడక్షన్స్ సమర్పణలో సూపర్ గుడ్ ఫిలింస్ బ్యానర్‌ పై ఆర్‌బి చౌదరి - ఎన్‌వి ప్రసాద్ ఈ సినిమాని నిర్మించారు. అక్టోబర్ 5న ప్రపంచ వ్యాప్తంగా ఈ సినిమా విడుదల కాబోతోంది.



నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.