శివ‌పుత్రుడు కాంబో..బాలా ముందు ఛాలెంజ్!

వైవిధ్య‌మైన‌ పాత్ర‌ల‌కు క‌మ‌ల్ హాస‌న్ త‌ర్వాత సూర్య‌ కేరాఫ్ అడ్ర‌స్‌ గా మారాడు. అయితే అతి ప్ర‌యోగాలు ఇటీవ‌ల బాగా దెబ్బ కొడుతున్నాయి. వ‌రుస ప‌రాజ‌యాల్ని ఎదుర్కోవాల్సి వచ్చింది. ఇటీవ‌ల వ‌చ్చిన `బందోబ‌స్త్‌` కూడా సూర్య‌ను ఫ్లాప్ నుంచి కాపాడ‌లేక‌పోయింది. దీంతో సూర్య నెక్ట్స్ ఫిల్మ్ ఎలా వుంటుందో అన్న చ‌ర్చ సాగుతోంది. ఈ సినిమా త‌రువాత సూర్య‌ `సాలా ఖ‌డూస్‌` ఫేమ్ సుధాకొంగ‌ర ద‌ర్శ‌క‌త్వంలో ఇండియ‌న్ పైల‌ట్.. ఏయిర్ డెక్క‌న్ పౌండ‌ర్ జీ.ఆర్ గోపీనాథ్ జీవిత క‌థ ఆధారంగా రూపొందుతున్న`సూర‌రాయ్ పోట్రు` చిత్రంలో న‌టిస్తున్నాడు.

క‌థానాయకుడిగా న‌టిస్తూనే అత్యంత‌ భారీ బ‌డ్జెట్ తో సూర్య స్వ‌యంగా 2డీ ఎంట‌ర్ టైన్ మెంట్ బ్యానర్ పై నిర్మిస్తున్నాడు. ప్ర‌స్తుతం చిత్రీక‌ర‌ణ ద‌శ‌లో వుంది. ఇదిలా వుండ‌గా సూర్య త‌న ఫేవ‌రెట్ డైరెక్ట‌ర్ బాలాతో ఓ కొత్త చిత్రానికి అంగీక‌రించాడు. పితామ‌గ‌న్‌.. నంద చిత్రాల్ని అందించి సూర్య‌కు న‌టుడిగా మంచి గుర్తింపును తెచ్చిపెట్టిన బాలాకు ఇదో ఛాలెంజ్ అనే చెప్పాలి. ఇందులో అధ‌ర్వ‌.. ఆర్య లాంటి యంగ్ హీరోలు కూడా కీల‌క పాత్ర‌ల్లో న‌టించ‌బోతున్నారు. సూర్య‌- బాల క‌ల‌యిక‌లో రాబోతున్న మూడ‌వ సినిమా ఇది. గ‌తంలో రెండు చిత్రాల‌తో మ్యాజిక్ చేసి సూర్య‌కు ప్ర‌త్యేక‌మైన ఇమేజ్ ని క‌ల్పించిన బాలా ముచ్చ‌ట‌గా మూడ‌వ సారి కూడా త‌న మ్యాజిక్ తో ఫ్లాప్ ల బాట‌లో న‌డుస్తున్న సూర్య‌కు హిట్టిస్తాడా? అన్న‌దే ఆస‌క్తిక‌రంగా మారింది.

`అర్జున్‌ రెడ్డి` ఆధారంగా రూపొందుతున్న `ఆదిత్య‌వ‌ర్మ‌` నుంచి అర్థాంత‌రంగా త‌ప్పుకున్న బాలా ఆ క‌సితో సూర్య‌కు హిట్టివ్వాల‌నే ప్లాన్ చేస్తున్నాడ‌ట‌. ఈ ద‌ఫా మ‌రింత ప‌వ‌ర్ ఫుల్ క‌థ‌తో సూర్య చిత్రాన్ని తెర‌పైకి తీసుకురాబోతున్నాడ‌ని.. వ‌చ్చే ఏడాది ప్ర‌ధ‌మార్థంలో ఈ సినిమా సెట్స్ పైకి రానుంద‌ని తెలిసింది.