బాలయ్య ప్రకటన.. ఆ సినిమాకు ఊపిరి

క్రియేటివ్ డైరెక్టర్ కృష్ణవంశీ నుంచి ఆయన స్థాయికి తగ్గ సినిమా వచ్చి చాలా కాలమైంది. ఏడాదిన్నర కిందట ‘గోవిందుడు అందరివాడేలే’ సినిమా ఆయన్ని తిరిగి సక్సెస్ ట్రాక్ ఎక్కిస్తుందని అభిమానులు ఆశించారు. కానీ అది గత సినిమాల కంటే బెటర్ అనిపించుకుంది కానీ.. హిట్టవ్వలేదు. ఈ మధ్యే సందీప్ కిషన్ హీరోగా ‘నక్షత్రం’ అనే సినిమా మొదలుపెట్టాడు కృష్ణవంశీ. ఐతే సందీప్ కూడా వరుస ఫెయిల్యూర్లతో అల్లాడుతున్నాడు. అతడి లేటెస్ట్ మూవీస్ రన్.. ఒక్క అమ్మాయి తప్ప రెండూ కూడా ఫ్లాపులే. దీంతో ‘నక్షత్రం’ మీదే జనాల్లో పెద్దగా ఆసక్తి లేదు. ఈ సినిమా విడుదల సమయానికి కూడా ఏమాత్రం హైప్ తెచ్చుకుంటుందో అన్నది అనుమానంగానే ఉంది.

ఐతే ఇలాంటి టైంలోనే నందమూరి బాలకృష్ణ చేసిన ప్రకటనతో ‘నక్షత్రం’ టీంకు ఊపొచ్చింది. తన తర్వాతి సినిమా కృష్ణవంశీతో ఉంటుందని బాలయ్య హిందూపురంలో వెల్లడించిన సంగతి తెలిసిందే. ‘నక్షత్రం’ కంటే ముందు బాలయ్య వందో సినిమాను డైరెక్ట్ చేయాలని ఆశపడ్డాడు కృష్ణవంశీ. ఇద్దరి మధ్యా సీరియస్ గానే చర్చలు జరిగాయి. కానీ చివరికి కృష్ణవంశీకి నో చెప్పి క్రిష్ దర్శకత్వంలో ‘గౌతమీపుత్ర శాతకర్ణి’ మొదలుపెట్టాడు బాలయ్య. ఐతే వందో సినిమాకు కాదన్నా.. ఆ తర్వాత మాత్రం కృష్ణవంశీతోనే పని చేయబోతున్నాడు బాలయ్య. ‘గౌతమీపుత్ర శాతకర్ణి’ లాంటి ప్రెస్టీజియస్ మూవీ తర్వాతి బాలయ్య లాంటి స్టార్ హీరో కృష్ణవంశీ దర్శకత్వంలో చేయబోతున్నాడంటే విపరీతమైన ఆసక్తి ఉంటుంది. దాని ఎఫెక్ట్ ‘నక్షత్రం’ మీద పాజిటివ్ గా ఉంటుందనడంలో సందేహం లేదు. విడుదలకు ముందు ఆటోమేటిగ్గా ఈ సినిమాకు హైప్ వచ్చేస్తుంది. బిజినెస్ బాగా జరగొచ్చు. జనాల్లోనూ బాగా ఆసక్తి నెలకొనవచ్చు. మొత్తానికి బాలయ్య చేసిన ప్రకటన ‘నక్షత్రం’కు వరంగా మారిందన్నమాట.