బాలయ్య-కెయస్.. పవర్ ఫుల్ టైటిల్ ఇదేనా?

నందమూరి బాలకృష్ణ.. తమిళ దర్శకుడు కెయస్ రవికుమార్ కాంబినేషన్లో త్వరలో సినిమా ప్రారంభం కానున్న సంగతి తెలిసిందే. గతంలో 'జైసింహా' సినిమా వీరి కాంబినేషన్లో తెరకెక్కింది. 'జైసింహా' ను నిర్మించిన సీ. కళ్యాణ్ ఈ సినిమాను కూడా నిర్మిస్తున్నారు. ఈ సినిమాకు మే 17 వ తేదీన కొబ్బరికాయ కొడతారని ఇప్పటికే వార్తలు వచ్చాయి. ఇదిలా ఉంటే తాజాగా ఈ సినిమా టైటిల్ గురించి ఒక ఇంట్రెస్టింగ్ అప్ డేట్ బయటకు వచ్చింది.

నిర్మాత సి.కళ్యాణ్ ఈ సినిమాకు 'రూలర్' అనే టైటిల్ ను ఫిలిం ఛాంబర్ లో రిజిస్టర్ చేయించారని వార్తలు వస్తున్నాయి. అధికారికంగా ఈ టైటిల్ ను కన్ ఫామ్ చేయనప్పటికీ పవర్ ఫుల్ టైటిల్ కావడంతో ఇది బాలయ్య కోసమే అయి ఉంటుందని టాక్ వినిపిస్తోంది. సహజంగా బాలయ్య సినిమాలకు ఎప్పుడూ పవర్ ఫుల్ టైటిల్స్ ను ఎంపిక చేస్తారు. ఈ సినిమాలో బాలయ్య ఒక పవర్ ఫుల్ పోలీస్ ఆఫీసర్ పాత్రలో నటిస్తారని అంటున్నారు. ఆ లెక్కన బాలయ్య మాస్ ఇమేజ్ కు.. క్యారెక్టరైజేషన్ కు 'రూలర్' టైటిల్ కరెక్ట్ గా సెట్ అవుందనడంలో సందేహం లేదు. అభిమానులకు కూడా ఈ టైటిల్ నచ్చే అవకాశం ఉంది.

జగపతి బాబు ఈ సినిమాలో కీలక పాత్రలో నటిస్తాడట. చిరంతన్ భట్ ఈ సినిమాకు సంగీత దర్శకుడిగా ఎంపిక చేశారట. ఈ సినిమా రెగ్యులర్ షూటింగ్ జూన్ లో ప్రారంభం అవుతుంది. ఈ ప్రాజెక్టుకు సంబంధించిన ఇతర వివరాలు త్వరలోనే వెల్లడవుతాయి.