ప్రతాపరుద్రుడు.. బాలయ్యా??

నందమూరి బాలకృష్ణ వందో సినిమా లెక్క ఇంకా తేలలేదు. బాలయ్య తన సెంచరీ మూవీగా ఏ సినిమా చేస్తారో, ఏ కేరక్టర్ వేస్తారో అనే ప్రశ్నకి.. లెక్కకి మించిన ఆన్సర్స్ ఉన్నాయి. బోయపాటి శ్రీను - సింగీతం శ్రీనివాసరావు తర్వాత.. బాలయ్య వందో సినిమాకి డైరెక్టర్ గా కృష్ణవంశీ పేరు తెరపైకి వచ్చింది. 'రైతు' అనే టైటిల్ రైతు నాయకుడి పాత్రలో బాలకృష్ణ చేయబోతున్నారనే వార్తలు హల్ చల్ చేశాయి. వీటి సంగతి తేలకముందే.. ఇప్పుడు బాలకృష్ణ ముందు మరో ఆప్షన్ వచ్చేసింది.

చాలా రోజులుగా రుద్రమదేవికి సీక్వెల్ గా ప్రతాపరుద్రుడుని తెరకెక్కించేందుకు దర్శకుడు గుణశేఖర్ సన్నాహాలు చేసుకుంటున్నాడు. ఈ మూవీకోసం ఈయన దగ్గర స్క్రిప్ట్ కూడా సిద్ధంగా ఉంది. ప్రతాపరుద్రుడు రోల్ కోసం గుణశేఖర్ ఇద్దరు స్టార్లను ఛాయిస్ గా పెట్టుకున్నాడని తెలుస్తోంది. ఒక వైపు ప్రభాస్ ను మరోవైపు నందమూరి బాలకృష్ణను... ఇద్దరినీ కన్సల్ట్ చేస్తున్నాడట. ఈ ఇద్దరిలో ఎవరు మూవీకి యాక్సెప్ట్ చేసినా.. సినిమాకు హై రేంజ్ వస్తుందన్నది గుణశేఖర్ ఆలోచన. ఇప్పటికే బాలకృష్ణను ఓమారు కలిసి స్టోరీ కూడా వినిపించాడట గుణశేఖర్. ఆయన నుంచి అవునని, కాదని సమాధానం మాత్రం రాలేదు. ప్రస్తుతం లేపాక్షి ఉత్సవాలను ప్రతిష్టాత్మకంగా నిర్వహిస్తున్న బాలకృష్ణ.. ఆ కార్యక్రమం పూర్తయ్యాక వందో సినిమాపై తుది నిర్ణయం తీసుకోనున్నారని తెలుస్తోంది.

ప్రతాపరుద్రుడిగా చారిత్రక పాత్రలో బాలకృష్ణ పర్ఫెక్ట్ గా సూట్ అయిపోతారని అందరికీ తెలుసు. గతంలో శ్రీకృష్ణ దేవరాయలు పాత్రతో మెప్పించిన బాలయ్య.. ఇప్పుడు ప్రతాపరుద్రుడుగా చేస్తే చూడాలని ఫ్యాన్స్ కూడా అనుకుంటున్నారు. అయితే అది వందో చిత్రం అనడమే వారిలో కొంత అసంతృప్తి నెలకొంది.