బాలయ్య వందలో వారసుడి ఎంట్రీ ఫిక్స్

చాలా సస్పెన్స్ తర్వాత తన వందో సినిమా ఏంటో తేల్చేశాడు నందమూరి బాలకృష్ణ. ఆదిత్య 369 సీక్వెల్ ని తన సెంచరీ మూవీగా సెలక్ట్ చేసుకున్నారాయన. ఈ విషయాన్ని తెలంగాణ సీఎం కేసీఆర్ కి చెప్పి ధృవీకరించారు కూడా. బసవతారకం కేన్సర్ హాస్పిటల్ కు సంబంధించి నైట్ షెల్టర్లు ఏర్పాటు చేయాలని కోరేందుకు తెలంగాణ సీఎంని కలిశారు ఏపీ ఎమ్మెల్యే బాలయ్య. ఈ సందర్భంగా జరిగిన మాటల్లో వందో సినిమాపై ఆరా తీసిన కేసీఆర్ కు.. కొత్త విశేషాలను వివరించారు బాలకృష్ణ.

ఆదిత్య 369 సీక్వెల్ తో పాటు మరో ఇంట్రెస్టింగ్ పాయింట్ కూడా చెప్పారు. అదే తన కొడుకు ఎంట్రీ. బాలయ్య బాబు కుమారుడు నందమూరి మోక్షజ్ఞ సినీ రంగ ప్రవేశం గురించి కొన్నాళ్లుగా వార్తలొస్తున్నాయి కానీ.. బాలయ్య మాత్రం నోరు విప్పలేదు. కానీ ఇప్పుడు మాత్రం తన ఆదిత్య 369 సీక్వెల్ లో మోక్షజ్ఞ నటిస్తున్నాడని, ఈ మూవీతోనే అరంగేట్రం చేయించబోతున్నానని చెప్పేశారు బాలకృష్ణ. వందో సినిమా ఏదో తెలిసిపోవడంతో పాటు బాలయ్యకు ప్రతిష్టాత్మకమైన సినిమాలోనే వారసుడి ఎంట్రీ కూడా ఉంటుందని ఫైనల్ కావడంతో.. అభిమానులు పండుగ చేసుకుంటున్నారు.

ఇప్పటికే ఫ్యాన్స్ సంబరాలు మొదలైపోగా.. మరో నెల రోజుల్లో ఈ మూవీ సెట్స్ పైకి వెళ్లే అవకాశాలు ఉన్నాయి. బాలయ్యకు ఎన్నో విభిన్నమైన చిత్రాలను అందించిన సింగీతం శ్రీనివాసరావు.. ఆదిత్య 999మాక్స్ అనే టైటిల్ పెడతారని భావిస్తున్న చిత్రానికి డైరెక్టర్.