ఆ విషయంలో చిరుపై బాలయ్యదే పైచేయి

ఒకప్పుడు మెగాస్టార్ చిరంజీవి.. నందమూరి బాలకృష్ణల మధ్య బాక్సాఫీస్ పోరు ఎంత ఆసక్తికరంగా ఉండేదో ప్రత్యేకంగా చెప్పాల్సిన పని లేదు. ఐతే చిరంజీవి సినిమాలకు దూరమైపోవడంతో చాలా ఏళ్ల పాటు ఈ రసవత్తర సమరానికి దూరమైపోయారు తెలుగు ప్రేక్షకులు. ఐతే ఈ సంక్రాంతికి మళ్లీ ఈ లెజెండ్స్ బాక్సాఫీస్ పోరుకు రెడీ అవుతున్నారు. చిరు రీఎంట్రీ మూవీ ‘ఖైదీ నెంబర్ 150’.. బాలయ్య వందో సినిమా ‘గౌతమీపుత్ర శాతకర్ణి’ సంక్రాంతికి సమరానికి సై అంటున్నాయి. క్రేజ్ పరంగా చూస్తే వీటిలో ఏదీ దేనికీ తీసిపోదు. ఐతే ప్రమోషన్ విషయంలో మాత్రం చిరు సినిమా మీద బాలయ్య చిత్రం పైచేయి సాధిస్తోందనే చెప్పాలి.

‘గౌతమీపుత్ర శాతకర్ణి’ ప్రారంభోత్సవమే ఏ స్థాయిలో జరిగిందో తెలిసిందే. ఆ తర్వాత ఫస్ట్ లుక్.. టీజర్ రిలీజ్ లు కూడా మంచి టైమింగ్ చూసి చేశారు. దీనికి తోడు ఎప్పటికప్పుడు ఆసక్తికరమైన ఆన్ లొకేషన్ ఫొటోలు రిలీజ్ చేశారు. షూటింగ్ అప్ డేట్స్ కూడా ఎప్పటికప్పుడు ఇస్తూ వచ్చారు. షూటింగ్ కూడా చాలా ముందే పూర్తవడంతో వచ్చే నెలలో ప్రమోషనల్ ఈవెంట్లు కూడా భారీగానే ప్లాన్ చేశారు. ప్రపంచవ్యాప్తంగా వంద థియేటర్లలో ఒకేసారి ట్రైలర్ లాంచ్ చేస్తున్నారు. చంద్రబాబు నాయుడు.. వెంకయ్య నాయుడు లాంటి అతిథుల సమక్షంలో భారీ ఆడియో వేడుక ప్లాన్ చేశారు.

మరోవైపు ‘ఖైదీ నెంబర్ 150’ విషయానికి వస్తే.. మొదట్నుంచి లో ప్రొఫైలే మెయింటైన్ చేస్తున్నారు. ఫస్ట్ లుక్స్ తప్పితే ఇంకేం రిలీజ్ చేయలేదు. టీజర్ రాలేదు. ట్రైలర్ లాంచ్ గురించి.. ఆడియో వేడుక గురించి ఇప్పటిదాకా అప్ డేట్స్ లేవు. ఇంకా షూటింగ్ పూర్తవలేదు. వచ్చే నెలంతా చిరంజీవి ‘మీలో ఎవరు కోటీశ్వరుడు’ షూటింగులో పాల్గొంటాడని అంటున్నారు. నిర్మాత రామ్ చరణ్ ‘ధృవ’ రిలీజ్ హడావుడిలో ఉన్నాడు. ఈ నేపథ్యంలో ప్రమోషన్ పరంగా ‘ఖైదీ నెంబర్ 150’ వెనకబడే అవకాశాలు కనిపిస్తున్నాయి.

Like Us on Facebook : https://www.facebook.com/Tupakidotcom/