గుణని ఫాలో అయిపోతున్న బాలయ్య

నందమూరి నటసింహం బాలకృష్ణ తన వందో చిత్రానికి సిద్ధమైపోయారు. గౌతమీ పుత్ర శాతకర్ణి చిత్రాన్ని చేయబోతున్నట్లుగా అధికారికంగానే ప్రకటించారు. యావత్ భారతాన్ని పరిపాలించిన చక్రవర్తి అయిన గౌతమీపుత్ర శాతకర్ణి జీవితాన్ని సినిమాగా రూపొందిస్తున్నారు బాలకృష్ణ. క్రిష్ దర్శకత్వంలో ఈ చిత్రం తెరకెక్కనుంది.

గుణశేఖర్ ఇప్పటికే చారిత్రాత్మక చిత్రం రుద్రమదేవిని రూపొందించి, సినీ పరిశ్రమలో ఓ చరిత్ర సృష్టించాడు. ఇప్పుడు బాలయ్య కూడా చారిత్రాత్మక చిత్రంతోనే ప్రేక్షకుల ముందుకు రాబోతున్నారు. అలాగే రుద్రమదేవి చిత్రం కోసం గుణశేఖర్ అన్ని నిజమైన ఆభరణాలనే ఉపయోగించాడు. తమిళనాడుకు చెందిన ఎన్ ఏసీ జ్యూవెల్లర్స్ సంస్థతో వీటిని తయారు చేయించారు.

ఈ విషయంలో కూడా బాలయ్య.. తన వందో చిత్రం గౌతమీపుత్ర శాతకర్ణిలో.. అన్నీ ఒరిజినల్ నగలనే ఉపయోగించనున్నారట. ఇందుకోసం కార్పొరేట్ గోల్డ్ రిటైల్ మాల్స్ తో చర్చలు నిర్వహిస్తున్నారని తెలుస్తోంది.