ఎఫ్ 2 తర్వాత నందమూరి హంగామా!

సీనియర్ హీరోల్లో నందమూరి బాలకృష్ణది ప్రత్యేకమైన శైలి. డైరెక్టర్ ఎవరైనా సరే.. అయన మాస్ ఇమేజ్ ని సరిగ్గా వాడుకోగలిగితే బ్లాక్ బస్టర్ సినిమా ఖాయం. ఇక ఈమధ్య కాలంలో బోయపాటి శ్రీను, క్రిష్ ఇద్దరూ బాలయ్య ఇమేజ్ కి తగ్గట్టు సినిమాలు తీయడమే కాకుండా సినిమాలను హిట్ చేశారు. ఇక యంగ్ డైరెక్టర్ అనిల్ రావిపూడి బాలయ్య తో సినిమా చేసేందుకు గతంలో ప్రయత్నించిన విషయం తెలిసిందే.

'రామారావు గారు' అనే రాజకీయ నేపథ్యం ఉన్న కథతో అనిల్ రావిపూడి బాలయ్యను మెప్పించాడని ఆ సినిమా దాదాపు ఫైనల్ అయిందని గతంలో వార్తలు వచ్చాయి. కానీ ఆ సినిమా ఎందుకో కార్యరూపం దాల్చలేదు. ఇప్పుడు తాజాగా అనిల్ రావిపూడి ఒక కథ రెడీ చేశాడని.. బాలయ్యకు వినిపించేందుకు రెడీ ఆవుతున్నాడని టాక్. బాలయ్య ఇమేజ్ కు సూట్ అయ్యేలా - హీరోయిజం పీక్స్ లో ఉండేలా కథ.. సీన్స్ పై అనిల్ కసరత్తు చేయడం జరిగిందట. ఈ కథను బాలయ్య ఒకే చేస్తే వచ్చే ఏడాది సెట్స్ పైకి వెళ్తుందని అంటున్నారు.

మరి ఇది 'రామారావు గారు' కథకు మెరుగులు దిద్ది తయారు చేసిందా లేదా పూర్తిగా కొత్త కథా అనే విషయం పై ఇంకా క్లారిటీ లేదు. బాలయ్య ప్రస్తుతం 'ఎన్టీఆర్' బయోపిక్ లో నటిస్తున్న విషయం తెలిసిందే. మరోవైపు అనిల్ ప్రస్తుతం వెంకటేష్ - వరుణ్ తేజ్ ల మల్టిస్టారర్ 'F 2' తో బిజీగా ఉన్నాడు. ఈ సినిమాల తర్వాత బాలయ్య-అనిల్ రావిపూడి సినిమా సెట్స్ మీదకు వెళ్ళే అవకాశాలు పుష్కలంగా ఉన్నాయట.