నాట్ ఎ జోక్.. బాలయ్యతో క్రిష్ సినిమా

ఒక్కో హీరోకు స్టయిల్ ఉంటుంది. ఆ స్టయిల్ కు తగ్గ దర్శకులే ఆ హీరోలకు సెట్టవుతారు. మరి బాలయ్య లాంటి మాస్ హీరోకు - క్రిష్ లాంటి క్లాస్ దర్శకుడికి సెట్ అవుతుందా అని ఎవరినైనా అడిగితే.. కాదనే అంటారు. కానీ ఈ సెన్సేషనల్ కాంబినేషన్లో సినిమా వచ్చే అవకాశాలున్నాయని ప్రస్తుతం టాలీవుడ్ లో చర్చ జరుగుతోంది. బాలయ్య మామూలుగా మాస్ సినిమాలే చేస్తాడు కానీ.. ఆయనకు పౌరాణిక - చారిత్రక నేపథ్యం ఉన్న సినిమాలంటే బాగా ఇష్టం అన్న సంగతి తెలిసిందే. క్రిష్ ఇటీవలే ‘కంచె’ లాంటి యుద్ధ నేపథ్యం ఉన్న హిస్టారికల్ మూవీతో ఆకట్టుకున్నాడు. ఇప్పుడు వరుణ్ తేజ్‌ తోనే ‘రాయబారి’ అనే హిస్టారికల్ బ్యాగ్రౌండ్ మూవీ చేస్తున్నాడు.

ఆ తర్వాత బాలయ్యతో ఓ సినిమా చేయడానికి క్రిష్ ఆసక్తి చూపిస్తున్నట్లు తెలిసింది. ఆయన దగ్గర మరో హిస్టారికల్ సబ్జెక్ట్ ఉందట. దాన్ని ఆల్రెడీ బాలయ్యకు వినిపించాడట. ప్రస్తుతం దాని మీద చర్చలు సాగుతున్నట్లు తెలిసింది. ఒకవేళ ఇద్దరికీ అంగీకారం కుదిరి.. ఈ కాంబినేషన్లో సినిమా వస్తే మాత్రం అది పెద్ద సెన్సేషన్ అవుతుందనడంలో సందేహం లేదు. 99వ సినిమాను యమ స్పీడుతో చేసేసిన బాలయ్య తన వందో సినిమా విషయంలో మాత్రం తర్జనభర్జన పడుతున్నాడు. ఆదిత్య 999తో పాటు బోయపాటి - అనిల్ రావిపూడి - పరుచూరి రవీంద్రల కథలు ఆయన కోసం ఎదురు చూస్తున్నాయి. వీటికి తోడు ఇప్పుడు క్రిష్ కథ కూడా తెరమీదికి వచ్చింది. మరి బాలయ్య మదిలో ఏముందో?