బాలయ్య మైండ్లో ఉన్న హీరో ఎవరు?

బాలయ్య ఏంటి.. మల్టీ స్టారర్ ఏంటి అంటారా? కానీ ఇది నిజం. తనకు మల్టీస్టారర్లు చేయడానికి ఎలాంటి అభ్యంతరం లేదని.. సరైన కథ వస్తే ఆ తరహా సినిమాలు చేయడానికి సిద్ధమని ప్రకటించాడు బాలయ్య. అంతే కాదు.. తాను ఒక హీరోతో కలిసి మల్టీస్టారర్ చేయాలని అనుకుంటున్నానని.. ఆ దిశగా స్క్రిప్టు కూడా రెడీ అవుతోందని.. వచ్చే ఏడాది ఈ సినిమా చేయాలనుకుంటున్నానని.. ఈ ప్రాజెక్టు మెటీరియలైజ్ అయ్యాక వివరాలు వెల్లడిస్తానని బాలయ్య తెలిపాడు.

సీనియర్ హీరోల్లో వెంకటేష్.. నాగార్జున ముందు నుంచి మల్టీస్టారర్లకు రెడీగా ఉన్నారు. కొన్ని మల్టీస్టారర్లు చేశారు. చిరంజీవి.. బాలయ్య మాత్రం మల్టీస్టారర్లకు దూరంగా ఉంటున్నారు. ఇప్పుడే రీఎంట్రీ ఇచ్చిన చిరంజీవి మల్టీస్టారర్ చేయడానికి సమయం పట్టొచ్చేమో. బాలయ్య లాంటి హీరో మల్టీస్టారర్ చేస్తే ఆ సినిమాకు మామూలు హైప్ రాదు. మరి ఆయన మైండ్లో ఉన్న ఆ హీరో ఎవరో చూడాలి.

ఇక తన తర్వాతి సినిమాగా అనుకుంటున్న ‘రైతు’ గురించి బాలయ్య చెబుతూ.. ‘‘ఇది తెలంగాణ నేపథ్యంలో సాగే కథ. చాలా సున్నితమైన అంశాలతో ముడిపడి ఉంటుంది. స్క్రిప్టు పకడ్బందీగా రెడీ అవుతోంది. అమితాబ్ బచ్చన్ గారిని ఓ కీలక పాత్రకు అడిగాం. ఆ రోల్ 5-6 నిమిషాలే ఉంటుంది. అయినప్పటికీ ఆయనే చేయాలి. సర్కార్-3 పూర్తయ్యాక డేట్లు కేటాయిస్తానని చెప్పారు. ఆయన సరే అంటేనే ఆ సినిమా ఉంటుంది. లేదంటే లేదు’’ అని మరోసారి స్పష్టం చేశాడు.

Like Us on Facebook : https://www.facebook.com/Tupakidotcom/