బాల‌య్య యాటిట్యూడ్ కి త‌గ్గ టైటిల్ ఇది

మ‌న‌సుండాలే కానీ వ‌య‌సుతో ప‌నేం ఉంది. ప్ర‌స్తుతం టాలీవుడ్ లో ఉన్న సీనియ‌ర్ హీరోలంతా 60ప్ల‌స్ లో ఉన్నా ఇంకా టీనేజీ స్పీడ్ తో సినిమాలు చేస్తుండ‌డం ఆశ్చ‌ర్య‌ప‌రుస్తోంది. ఇక ఇండ‌స్ట్రీ నాలుగు పిల్ల‌ర్ల‌లో ఒక‌రైన‌ న‌ట‌సింహా నంద‌మూరి బాల‌కృష్ణ జోరు చూస్తుంటే ఇంకా ఆశ్చ‌ర్య‌పోవాలి. ఆయ‌న బ్యాక్ టు బ్యాక్ సినిమాల‌తో స్పీడ్ పెంచేస్తున్నారే కానీ ఎక్క‌డా త‌గ్గ‌డం లేదు.

బోయ‌పాటితో అఖండ హ్యాట్రిక్ హిట్ గా నిలిచింది. ఇక ఇదే ఊపులో గోపిచంద్ మ‌లినేనితో భారీ మాస్ యాక్ష‌న్ ఎంట‌ర్ టైన‌ర్ లో న‌టిస్తున్నారు. అలాగే ఎఫ్ 3 డైరెక్ట‌ర్ అనిల్ రావిపూడితో సినిమాకి స‌న్నాహ‌కాల్లో ఉన్నారాయ‌న‌. త్వ‌ర‌లో రావిపూడితో సినిమా సెట్స్ పైకి వెళ్లబోతోంది.

సెప్టెంబర్ నుండి చిత్రీక‌ర‌ణ ప్రారంభించి కేవ‌లం నాలుగు నెలల్లో చిత్రీకరణ పూర్తి చేసి సమ్మర్ ముందే విడుదల చేయాలనేది ప్లాన్‌. ఈ చిత్రానికి క్రేజీ టైటిల్ ని ఫిక్స్ చేసినట్లు అనిల్ రావిపూడి తెలిపారు. `బ్రో ఐ డోంట్ కేర్` అనేది టైటిల్. బాలకృష్ణ మాస్ ఇమేజ్ కి యాటిట్యూడ్ కి త‌గ్గ టైటిల్ ఇద‌న‌డంలో సందేహం లేదు.

తొలుత `ఐ డోంట్ కేర్` అని టైటిల్ ఫిక్స్ చేసినా నేటిత‌రానికి క‌నెక్ట‌య్యేలా యూత్ ఫుల్ గా ఉండాల‌ని.. `బ్రో`ని టైటిల్లో జోడించార‌ట‌. ఇప్ప‌టికే న‌టీన‌టులు సాంకేతిక నిపుణుల ఎంపిక జ‌రుగుతోంది. ఈ చిత్రంలో బాలకృష్ణ కూతురుగా శ్రీలీల నటిస్తోంది. బాలయ్యకు జోడీగా ఓ మాజీ హీరోయిన్ ని ఎంపిక చేసార‌ని క‌థ‌నాలొచ్చాయి. త‌న పేరును టీమ్ వెల్ల‌డించాల్సి ఉంటుంది. సాహు గార‌పాటి ఈ చిత్రాన్ని నిర్మిస్తున్నారు. బాల‌య్య మార్క్ యాటిట్యూడ్ ఫ‌న్ తో అనీల్ రావిపూడి మార్క్ ట్రీట్ తో ఈ మూవీ అల‌రించ‌నుంద‌ని స‌మాచారం.

అన్ని జోన‌ర్ లు ట‌చ్ చేస్తున్నారు

గోపీచంద్ మలినేని దర్శకత్వంలో నందమూరి బాలకృష్ణ సినిమా షూటింగ్ ప్రస్తుతం హైదరాబాద్ రామోజీ ఫిలింసిటీలో జరుగుతోంది. ఇది రియ‌ల్ స్టోరీని ఫిక్ష‌నైజ్ చేసి తెర‌కెక్కిస్తున్న సినిమా. ఇటీవ‌ల ఒక‌ కలర్ ఫుల్ సెట్ లో పాటను చిత్రీకరించారు. `అఖండ` చిత్రానికి సంగీతం అందించిన ఎస్.ఎస్.థమన్ ఈ చిత్రానికి కూడా బాణీల‌ను అందిస్తున్నారు. ఇందులో శ్రుతి హాసన్ తొలిసారి న‌ట‌సింహా స‌ర‌స‌న‌ కథానాయికగా కనిపించనుంది. ఈ ప్రాజెక్టును మైత్రీ మూవీ మేకర్స్ సంస్థ నిర్మిస్తోంది.

త‌దుప‌రి ఆదిత్య 369 సీక్వెల్ పైనా దృష్టి సారిస్తార‌ని స‌మాచారం. ఎన్.బి.కే న‌ట‌వార‌సుడు నంద‌మూరి మోక్ష‌జ్ఞ ఎంట్రీ మూవీ కోసం ఇప్ప‌టి నుంచే బాల‌య్య భారీ ప్లానింగ్ తో ఉన్నారు. ఆ ప్రాజెక్ట్ త‌న‌కు ఎంతో కీల‌క‌మైన‌ది. త‌న‌యుడిని స్వీయ ద‌ర్శ‌క‌త్వంలో లాంచ్ చేయాల‌న్న ఆలోచ‌న కూడా బాల‌య్య కు ఉంది. మోక్ష‌జ్ఞ ఎంట్రీ మూవీ గురించి బోలెడంత చ‌ర్చ సాగింది. ఆదిత్య 369 సీక్వెల్ లో అత‌డు న‌టిస్తాడ‌ని బాల‌య్య అతిథిగా క‌నిపిస్తార‌ని.. `ఆదిత్య 999 మ్యాక్స్` అనే టైటిల్ ఫిక్స్ చేశార‌ని కూడా ప్ర‌చార‌మైంది. ఈ మూవీ ఎన్.బి.కే లైఫ్ లోనే స్పెష‌ల్ మూవీ కానుందని స‌మాచారం.