ఆ ముహూర్తం అందుకే పెట్టారు

నందమూరి తారకరామారావు గారి బయోపిక్ కోసం అభిమానులు ఎంతగా ఎదురుచూస్తున్నారో అందరికి తెలిసిందే. ఆయన తనయుడు బాలకృష్ణ తండ్రి పాత్రతోనే కనిపిస్తూ సినిమాను స్టార్ట్ చేశాడు. ఎన్నో మలుపులు తిరిగిన ఎన్టీఆర్ బయోపిక్ తెరపై అలానే కనిపిస్తుందా లేదా అనేది ఆసక్తికరంగా మారింది. ఇకపోతే మార్చ్ 29నే ఎన్టీఆర్ బయోపిక్ ను లాంచ్ చేయడానికి ఒక బలమైన కారణం ఉందట. ఆ విషయాన్ని బాలకృష్ణే బయటపెట్టాడు.

బాలకృష్ణ మొదటి సినిమా రామకృష్ణ స్టూడియోలోనే మొదట స్టార్ట్ అయ్యింది. ఇకపోతే ఎన్టీఆర్ పాతాళ భైరవి మార్చ్ 15న రిలీజ్ అయ్యింది. ఆ సినిమా మొదటి వారంలోనే భారీ క్రేజ్ ను అందుకుంది. థియేటర్స్ ప్రింట్స్ కూడా పెరుగుతూ వచ్చాయి. ముఖ్యంగా మార్చ్ 29న ఎక్కువ ప్రింట్స్ ని విడుదల చేయడంతో అప్పట్లో ఆ సినిమా సౌత్ ఇండస్ట్రీలోనే బిగ్గెస్ట్ హిట్ గా నిలిచిందని బాలయ్య వివరించారు. అదే విధంగా ఎన్టీఆర్ మొదటి కలర్ సినిమా దేశోద్ధారకుడు కూడా ఇదే రోజు విడుదలైందని చెబుతూ.. సరికొత్త రికార్డులను క్రియేట్ చేసిన లవకుశ కూడా మార్చ్ 29న విడుదలైందని వివరించారు.

ఆ విధంగా ఈ రోజు నాన్నగారికి అలాగే తమకు చాలా ముఖ్యమైన రోజు అయినందువల్ల బయోపిక్ ని కూడా ఇదే రోజు లాంచ్ చేసినట్లు చెప్పారు. బాలయ్య మొదటి షాట్ లో తనకు ఎంతో ఇష్టమైన దుర్యోదన వేషధారణలో కనిపించి కార్యక్రమం ముగిసేవరకు అదే కాస్ట్యూమ్ తో అందరిని ఆకట్టుకున్నారు. ఇక తేజ దర్శకత్వంలో తెరకెక్కబోయే ఈ సినిమాకు కీరవాణి సంగీతం అందిస్తున్నాడు. సాయి కొర్రపాటి - బాలకృష్ణ సంయుక్తంగా ఎన్టీఆర్ చిత్రాన్ని నిర్మిస్తున్నారు.