జాతకం ప్రకారమే మోక్షజ్న లాంచింగ్

సినీ పరిశ్రమలో జాతకాలు - ముహూర్తాలు - సెంటిమెంట్లు నమ్మే జనాలు చాలామంది ఉంటారు. అందులో ముందుగా చెప్పుకోవాల్సింది నందమూరి బాలకృష్ణ గురించే. ఆయనకు దైవ భక్తి ఎక్కువే. అలాగే జ్యోతిషం - జాతకం లాంటి అంశాల మీదా నమ్మకం ఎక్కువే. బాలయ్యకు జాతకాలంటే ఎంత గురో చెప్పడానికి చాలా ఉదంతాలున్నాయి. బాలయ్య ముహూర్తాలు చూసుకోకుండా ఇంటి నుంచి కాలు కూడా అడుగుపెట్టడని సన్నిహితులు చెబుతారు. తన సినిమాలన్నింటి విషయంలోనూ ఆయనకు ఈ పట్టింపులుంటాయి. అలాగే తన కొడుకు మోక్షజ్న తెరంగేట్రం విషయంలోనూ బాలయ్య జాతకం ప్రకారమే నడుచుకుంటున్నారు.

మోక్షజ్న తెరంగేట్రం 2017లో ఉంటుందని బాలయ్య కొన్నేళ్ల కిందటే చెప్పిన సంగతి తెలిసిందే. ఆ సమయానికి బాలయ్య కొడుకు లాంచింగ్ కు తగ్గ వయసులో ఉంటాడేమో అని అంతా అప్పుడనుకున్నారు. కానీ పర్టికులర్ గా ఈ సంవత్సరమే మోక్షజ్న తెరంగేట్రానికి ఎంచుకోవడానికి కారణం జాతకమట. తన ఆస్థాన జ్యోతిష్యులతో సంప్రదించి.. మోక్షజ్న కోసం ఓ ముహూర్తం చూసి పెట్టాడట బాలయ్య. ఈ సంగతి తాజాగా మీడియాతో మాట్లాడుతూ కూడా చెప్పాడు. జాతకం ప్రకారమే తన కొడుకును వచ్చే సంవత్సరం అరంగేట్రం చేయిస్తున్నట్లు చెప్పాడు. మోక్షజ్నతో తనతో కలిసి ‘ఆదిత్య 999’లో నటించబోతున్న సంగతి కూడా మరోసారి కన్ఫమ్ చేశాడు బాలయ్య.