బాలయ్య మరోసారి ఊ కొడతారా ఉలిక్కి పడతారా...!

నందమూరి బాలకృష్ణ ఇండస్ట్రీలో అడుగు పెట్టి ఇన్ని సంవత్సరాలు అయినా కూడా హీరోగానే సినిమాలు చేస్తున్నారు తప్ప కొత్తగా ప్రయత్నించాలి అనుకోలేదు. ఒక్క సారి ఊ కొడతారా ఉలిక్కి పడతారా సినిమా కోసం మాత్రం చిన్న గెస్ట్ రోల్‌ ను పోషించాడు. ఆ తర్వాత అంతకు ముందు పూర్తిగా హీరోగానే ఆ సినిమాలు చేశాడు.

ఇప్పుడు మరోసారి ఊ కొడతారా ఉలిక్కి పడతారా తరహా లోనే బాలయ్య గెస్ట్‌ రోల్‌ చేసేందుకు ఓకే చెప్పాడా అంటే అవును అనే సమాధానం వినిపిస్తుంది. తనకు సింహా.. లెజెండ్‌.. అఖండ వంటి భారీ విజయాలను అందించిన బోయపాటి అడగడం తో కాదనలేక గెస్ట్‌ రోల్‌ చేసేందుకు ఓకే చెప్పాడు అంటూ ప్రచారం జరుగుతోంది.

విశ్వసనీయంగా అందుతున్న సమాచారం ప్రకారం ప్రస్తుతం బోయపాటి శ్రీను దర్శకత్వంలో రామ్‌ హీరోగా రూపొందుతున్న సినిమాలో కీలకమైన గెస్ట్‌ పాత్రలో బాలయ్య ను చూపించబోతున్నారట. బాలయ్య ఇమేజ్ కు తగ్గట్లుగానే ఆ పాత్ర చాలా పవర్ ఫుల్ గా ఉంటుందని.. కథలో కీలకంగా ఉంటుందని తెలుస్తోంది.

రామ్ కు ఈ సినిమా సక్సెస్ చాలా కీలకం. ఇక అఖండ సినిమా తర్వాత బోయపాటి నుండి రాబోతున్న సినిమా అవ్వడం వల్ల అంచనాలు భారీగా ఉన్నాయి. ఆ అంచనాలకు తగ్గట్లుగా మెరుగులు హంగులు ఉండాలనే ఉద్దేశ్యంతో ఈ నిర్ణయానికి వచ్చారని కూడా వార్తలు వస్తున్నాయి. అతి త్వరలోనే రామ్‌ సినిమాలో బాలయ్య విషయమై క్లారిటీ వచ్చే అవకాశం ఉంది.

ఇక బాలయ్య సినిమాల విషయానికి వస్తే గోపీచంద్ మలినేని దర్శకత్వంలో రూపొందుతున్న సినిమా సంక్రాంతికి ప్రేక్షకుల ముందుకు రాబోతుంది. ఆ వెంటనే అనీల్‌ రావిపూడి దర్శకత్వంలో బాలయ్య ఒక సినిమా చేయాల్సి ఉంది.

ఇటీవలే పరశురామ్‌ దర్శకత్వంలో గీతాఆర్ట్స్ బ్యానర్ లో బాలయ్య సినిమా కన్ఫర్మ్‌ అయినట్లుగా వార్తలు వస్తున్నాయి. ఇంత బిజీగా ఉన్నా కూడా బోయపాటి కోసం రామ్‌ సినిమాలో గెస్ట్‌ రోల్‌ కి బాలయ్య ఓకే చెప్పాడు అంటూ ఇండస్ట్రీ వర్గాల ద్వారా సమాచారం అందుతోంది.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.