105లో గ్యాంగ్ స్టర్ బాలయ్య

ఎన్టీఆర్ బయోపిక్ తర్వాత సుమారు ఆరు నెలలు గ్యాప్ తీసుకున్న నందమూరి బాలకృష్ణ ఇటీవలే కెఎస్ రవికుమార్ దర్శకత్వంలో నటించబోయే సినిమాను పూజా కార్యక్రమాలతో మొదలుపెట్టిన సంగతి తెలిసిందే. రెగ్యులర్ షూటింగ్ ఇంకొద్ది రోజుల్లో స్టార్ట్ కాబోతోంది. కథ గురించి గతంలో చాలా ఊహాగానాలు రేగాయి. పొలిటికల్ బ్యాక్ డ్రాప్ లో ఉంటుందని వర్తమాన రాజకీయాలపై సెటైర్లు ఉంటాయని ఇలా ఏదేదో ప్రచారం జరిగింది.

నిర్మాత సి కళ్యాణ్ వీటికి చెక్ పెడుతూ క్లారిటీ ఇచ్చారు. ఒక పోలీస్ ఆఫీసర్ గ్యాంగ్ స్టర్ గా మారితే వచ్చే పరిణామాలను ఆధారంగా చేసుకుని ఫుల్ మాస్ ఎంటర్ టైనర్ గా తీర్చిద్దిద్దుతున్నట్టు చెప్పారు. డ్యూయల్ షేడ్స్ ఉంటాయి కాని డబుల్ రోల్ కాదన్న మాట. జైసింహలో కూడా ఇదే తరహాలో బాలయ్య రెండు వేరియేషన్స్ ఉన్న పాత్రలు చేశారు కాని అవి పోలీస్ డాన్ రోల్స్ కావు

ఇలా బాలయ్య గ్యాంగ్ స్టర్ గా నటించడం మొదటిసారి కాదు. గతంలో యువరత్న రాణాలో కంప్లీట్ మాఫియా డాన్ గా చేశారు. అది ఆశించిన ఫలితం అందుకోలేదు. అశోక చక్రవర్తి సైతం ఫ్లాప్ గానే నిలిచింది. అయితే పోలీస్ గా నటించినవి మాత్రం రౌడీ ఇన్స్ పెక్టర్ లాగా బ్లాక్ బస్టర్స్ అయినవి ఉన్నాయి.

మరి ఈ రెండు పాత్రలను మిక్స్ చేసుకుని వస్తున్న ఈ మూవీపై అప్పుడే అభిమానుల అంచనాలు పెరిగిపోతున్నాయి. శాతకర్ణి-జైసింహ లకు సంగీతం అందించిన చిరంతన్ భట్ మూడో సారి బాలయ్య కోసం ట్యూన్స్ కడుతున్నాడు. వచ్చే సంక్రాంతికి బరిలో నిలవబోతున్న ఈ సినిమాకు క్రాంతి అనే టైటిల్ పరిశీలనలో ఉన్నట్టు తెలిసింది