బాలయ్య వారసుడు వస్తున్నాడా

నందమూరి బాలకృష్ణ వారసుడిగా మోక్షజ్ఞ ఎంట్రీ కోసం అభిమానులు ఎప్పటి నుంచో ఎదురు చూస్తున్నారు . ఎన్టీఆర్ బయోపిక్ లోనే చిన్న పాత్ర ఉంటుందని ఆశించారు కాని అలాంటిది ఏమి లేకపోవడం కొంత నిరాశ పరిచింది కూడా. మనం తరహాలో అఖిల్ ని పరిచయం చేసినట్టు మోక్షజ్ఞని కూడా ఇందులో అలాగే చూపిస్తారని కొంత టాక్ నడిచింది. అయితే అందులో నటించకపోవడమే మంచిదైందని ఇప్పుడు అనుకుంటున్నారు లెండి.

గత కొంత కాలంగా మోక్షజ్ఞ బయట ఎక్కడా కనిపించడం లేదు. మీడియా కెమెరాలకు చిక్కకుండ ఎక్కడో దూరంగా సినిమా క్రాఫ్ట్స్ కి సంబంధించి శిక్షణ ఇస్తున్నారని చాలా కాలం నుంచే వార్త ప్రచారం లో ఉంది. అయితే ఎక్కడా ఎవరు అనే వివరాలు మాత్రం టాప్ సీక్రెట్ గా ఉంచారు .ఆ మధ్య ఓ జూనియర్ ఆర్టిస్ట్ తో మోక్షజ్ఞ బయట ఎక్కడో క్యాజువల్ దిగిన ఫోటో బాగా వైరల్ అయ్యింది. అందులో కాస్త బొద్దుగా ఉండటంతో పాటు హీరోయిక్ లుక్ లేదే అన్న కామెంట్స్ కూడా వచ్చాయి.

వాటికి సమాధానం ఇవ్వడం కోసమే అన్నట్టుగా మోక్షజ్ఞ బాగా సన్నబడినట్టు కనిపిస్తోంది. తాజాగా తన సోదరి తేజస్వినిలో ఓ ఫైవ్ స్టార్ హోటల్ ఎంట్రన్స్ లో డిన్నర్ కు వెళ్తున్న మోక్షజ్ఞని ఓ పౌరుడి సెల్ ఫోన్ కెమెరా పట్టేసింది. వెలుతురు లేక తగినంత క్లారిటీ లేకపోయింది కాని మోక్షజ్ఞ శరీరంలో మార్పు స్పష్టంగా కనిపిస్తోంది. మహా అయితే ఇంకో రెండేళ్ళలో మోక్షజ్ఞ ఎంట్రీ ఖాయమే. వారాహి అధినేత సాయి కొర్రపాటి మూడేళ్ళ క్రితం రానే వచ్చాడు మా రామయ్య పేరుతో టైటిల్ కూడా రిజిస్టర్ చేసి ఉంచారు. మరి ఏది డెబ్యు మూవీ అవుతుందో చూడాలి