బాలయ్య మళ్లీ షాకిచ్చాడు

డైరెక్టర్ శ్రీవాస్ మళ్లీ స్పెల్ బౌండ్ అయిపోయాడట. బాలయ్య ఉత్సాహం చూసి షాకయ్యాడట. ఇంతకుముందోసారి ఓ డ్యాన్స్ మూమెంట్ ను సింగిల్ టేక్ లో ఓకే చేసిన బాలయ్య తనకు షాకిచ్చాడంటూ ట్విట్టర్ లో నందమూరి అభిమానులతో పంచుకున్న శ్రీవాస్.. ఇప్పుడు మరోసారి తన ఎనర్జీతో మెస్మరైజ్ చేశాడని అంటున్నాడు శ్రీవాస్.

ఇటీవలే 150 మంది ఫైటర్లతో ‘డిక్టేటర్’ క్లైమాక్స్ ను భారీ స్థాయిలో షూట్ చేశాడట శ్రీవాస్. ఈ సందర్భంగా ఓ రిస్కీ సీన్ కు డూప్ పెడదామని అంటే బాలయ్య ఒప్పుకోలేదట. తనే స్వయంగా ఆ సీన్ చేసేసి అబ్బురపరిచాడట. 55 ఏళ్ల వయసున్న బాలయ్య కుర్రాడిలా ఎంతో ఉత్సాహంగా ఆ సీన్ చేయడం చూసి శ్రీవాస్ తో పాటు స్టంట్ కొరియోగ్రాఫర్లు కూడా స్టన్ అయిపోయారట.

ఇప్పటికే టాకీ పార్ట్ అంతా పూర్తి చేసుకున్న ‘డిక్టేటర్’ ప్రస్తుతం పోస్ట్ ప్రొడక్షన్ కార్యక్రమాలు జరుపుకుంటోంది. ఈ ఆదివారమే ఆంధ్రప్రదేశ్ రాజధాని అమరావతిలో ‘డిక్టేటర్’ ఆడియో ఫంక్షన్ చేయబోతున్నారు. ఈ కార్యక్రమానికి రాజకీయ, సినీ ప్రముఖులు పెద్ద ఎత్తున హాజరవుతారు. సంక్రాంతి సందర్భంగా జనవరి 14న ఈ సినిమా ప్రేక్షకుల ముందుకు రానుంది.