ఓవర్సీస్ మార్కెట్ పై శాతకర్ణి కన్ను

నందమూరి బాలకృష్ణ ప్రస్తుతం తన వందో చిత్రం 'గౌతమిపుత్ర శాతకర్ణి' చిత్ర షూటింగ్ కోసం మొరాకోలో ఉన్నారు. యుద్ధానికి సంబంధించిన సీన్స్ తో పాటు కొన్ని కీలక సన్నివేశాలను కూడా ఇక్కడే తెరకెక్కించనున్నారు. మొరాకో షెడ్యూల్ పూర్తయిన వెంటనే అమెరికా టూర్ వెళ్లనున్నారు బాలకృష్ణ.

మే నెల చివర్లో బాలయ్య అమెరికా టూర్ ప్రారంభమవుతుంది. ఇక్కడ కొన్ని ఈవెంట్లతో పాటు స్వచ్ఛంద సంస్థలు నిర్వహించే డిన్నర్లలో కూడా బాలకృష్ణ పాల్గొంటారు. వీటన్నిటితో పాటు జూన్ 10న తమ అభిమాన నటసింహం పుట్టిన రోజు వేడుకలను భారీ ఎత్తున నిర్వహించేందుకు.. బాలయ్య అమెరికా అభిమానులు ఏర్పాట్లు చేసుకుంటున్నారు. వీటికి తోడు తన మూవీ గౌతమిపుత్ర శాతకర్ణి చిత్రంతో ఓవర్సీస్ కలెక్షన్స్ లోనూ రికార్డులు సృష్టించేందుకు బాలయ్య ప్లాన్ చేసుకుంటున్నట్లు తెలుస్తోంది.

ఇప్పటివరకూ యూఎస్ లో బాలయ్య కనీసం అర మిలియన్ మార్క్ ను కూడా టచ్ చేయలేదు. కానీ గౌతమిపుత్ర శాతకర్ణి మూవీని మిలియన్ డాలర్ క్లబ్ లో చేర్చేలా ప్లానింగ్స్ జరుగుతున్నాయి. ఇందుకోసం.. బాలయ్య అమెరికా టూర్ లోనే ఈ సినిమాకి సంబంధించిన ఫస్ట్ టీజర్ ను విడుదల చేస్తారని తెలుస్తోంది. దర్శకుడు క్రిష్ కు ఓవర్సీస్ లో మంచి పేరు ఉంది. పైగా గౌతమిపుత్ర శాతకర్ణికి క్రిష్ తండ్రి, అతని స్నేహితుడే నిర్మాతలు కావడంతో.. అన్ని ఏరియాల్లోనూ కలెక్షన్స్ కుమ్మేసేలా ప్లాన్ చేస్తున్నాడు దర్శకుడు.