రోహిత్ కోసం బాలయ్య వస్తున్నాడు

నందమూరి బాలకృష్ణకు, నారా వారి కుటుంబానికి ప్రస్తుతం ఎంత మంచి సంబంధాలున్నాయో తెలిసిందే. నారా రోహిత్ కు కూడా బాలయ్య ఫుల్ సపోర్ట్ ఇస్తున్నాడు కొన్నేళ్లుగా. ఆ మధ్య ‘ఒక్కడినే’ సినిమా ఆడియో వేడుకకు బాలయ్య ముఖ్య అతిథిగా విచ్చేసి ఆడియో రిలీజ్ చేసిన సంగతి గుర్తుండే ఉంటుంది. మళ్లీ ఇన్నేళ్లకు రోహిత్ కోసం మళ్లీ వస్తున్నాడు బాలయ్య.

నారా వారబ్బాయి కొత్త సినిమా ‘సావిత్రి’ ఆడియో ఫంక్షన్ ఈ శుక్రవారమే జరగబోతోంది. బాలయ్యే దానికి ముఖ్య అతిథిగా రాబోతున్నట్లు సమాచారం. బాలయ్య వందో సినిమాలోనూ రోహిత్ ఓ కీలక పాత్ర పోషించబోతున్నట్లు వార్తలొస్తున్న నేపథ్యంలో ఆడియో వేడుకలో బాలయ్య ఆ ప్రస్తావనేమైనా తెస్తాడా అన్నది ఆసక్తికరం.

‘ప్రేమ ఇష్క్ కాదల్’ ఫేమ్ పవన్ సాధినేని దర్శకత్వంలో ‘సావిత్రి’ తెరకెక్కుతోంది. ఇప్పటికే దాదాపుగా షూటింగ్ అయిపోవచ్చింది. ఫస్ట్ లుక్ పోస్టర్ - టీజర్ - రోహిత్ పాడిన పాట.. అన్నీ కూడా ఆసక్తికరంగా ఉండి సినిమా మీద అంచనాల్ని పెంచాయి. టాలెంటెడ్ హీరోయిన్ నందిత ఇందులో టైటిల్ పాత్ర పోషిస్తోంది. ఏప్రిల్లోనే ఈ సినిమా ప్రేక్షకుల ముందుకొచ్చే అవకాశాలున్నాయి. రోహిత్ లేటెస్ట్ మూవీ ‘తుంటరి’ ఇంకో తొమ్మిది రోజుల్లో విడుదల కాబోతోంది. ఆ సినిమా మీద కూడా అంచనాలు బాగానే ఉన్నాయి.