నాని డ్యాన్సుకు బాల‌య్య విజిల్స్‌

తెర‌మీద బాల‌య్య డ్యాన్సు చేస్తున్నా.. ఫైట్లు చేస్తున్నా.. డైలాగ్ చెబుతున్నా ఆయ‌న అభిమానులు ఈల‌లు కేక‌ల‌తో థియేట‌ర్ల‌ను హోరెత్తించ‌డం మామూలే. కానీ తెర మీద వేరే హీరో స్టెప్పుల‌కు బాలయ్య విజిల్స్ కొట్ట‌డం ఎప్పుడైనా చూశారా? అస‌లిలాంటిది జ‌రుగుతుంద‌ని ఎవ్వ‌రైనా ఊహించ‌గ‌ల‌రా? కానీ అలా నిజంగానే జ‌రిగింద‌ని.. దానికి తానే సాక్షిన‌ని అంటున్నాడు నేచుర‌ల్ స్టార్ నాని. బాల‌య్య విజిల్స్ కొట్టింది కూడా త‌న డ్యాన్సు చూసే అని చెబుతున్నాడు నాని. ఐతే ఇది నాని బాల‌య్య అభిమానిగా న‌టించిన ‘కృష్ణ‌గాడి వీర ప్రేమ గాథ’ సినిమా విష‌యంలో కాదు. నాని కెరీర్ తొలి నాళ్ల‌లో న‌టించిన ‘రైడ్’ సినిమాకు ఎదురైన అనుభ‌వ‌మిది.

బాల‌య్య ‘మంగ‌మ్మ‌గారి మ‌న‌వ‌డు’ సినిమాలోని దంచ‌వే మేన‌త్త కూతురా పాటను ‘రైడ్’ సినిమాలో రీమిక్స్ చేయ‌డం.. అందులో నాని స్టెప్పులేయ‌డం తెలిసిందే. కాగా ఈ సినిమా ప్రివ్యూ షోకు బాల‌య్య‌ను ఆహ్వానించి ఆయ‌న‌తో క‌లిసి సినిమా చూసింద‌ట ఆ చిత్ర యూనిట్‌. ఈ సంద‌ర్భంగా దంచ‌వే మేన‌త్త కూతురా.. పాట వ‌చ్చిన‌పుడు బాల‌య్య ఉత్సాహంగా విజిల్స్ కొడుతూ ఎంజాయ్ చేశాడ‌ట‌. బాల‌య్య‌ను అలా చూసి నాని స‌హా ‘రైడ్’ యూనిట్ స‌భ్యులంతా ఆశ్చ‌ర్య‌పోయార‌ట‌. ఆ అనుభ‌వాన్ని నాని ఇప్పుడు గుర్తు చేసుకున్నాడు. నాని బాల‌య్య అభిమానిగా న‌టించిన ‘కృష్ణ‌గాడి వీర ప్రేమ‌గాథ’ చిత్రాన్ని కూడా బాల‌య్య చూసి బాలయ్య భ‌లే ఎంజాయ్ చేశాడ‌ని నిర్మాత అనిల్ సుంక‌ర చెప్పిన సంగ‌తి తెలిసిందే.