'నారప్ప' దర్శకుడితో బాలకృష్ణ?

'అఖండ'కు ముందువరకూ బాలకృష్ణ వరుస సినిమాలు చేసుకుంటూ వచ్చినప్పటికీ, ఆ సినిమాలు అంతగా ఆయనకి కలిసి రాలేదు. బాలకృష్ణతో పాటు ఆయన అభిమానులు చాలా కాలంగా వెయిట్ చేస్తున్న హిట్ 'అఖండ'తోనే దక్కింది. దాంతో ఇప్పుడు బాలకృష్ణ మంచి జోరుమీద ఉన్నారు. ఆయన తాజా చిత్రం గోపీచంద్ మలినేని దర్శకత్వంలో ఉండనుంది. ఈ నెల 16వ తేదీ నుంచి ఈ సినిమా రెగ్యులర్ షూటింగు మొదలుకానుంది. రాయలసీమ నేపథ్యంలో ఈ కథ నడుస్తుందనే టాక్ బయటికి రావడంతో అభిమానులందరిలో ఆసక్తి మొదలైంది.

ఈ నేపథ్యంలోనే శ్రీకాంత్ అడ్డాల దర్శకత్వంలో బాలకృష్ణ ఒక సినిమా చేయనున్నట్టుగా వార్తలు వినిపిస్తున్నాయి. ఈ సినిమాకి దిల్ రాజు నిర్మాతగా వ్యవహరించనున్నారని అంటున్నారు. 'కొత్త బంగారులోకం' సినిమాతో శ్రీకాంత్ అడ్డాలను దర్శకుడిగా పరిచయం చేసింది దిల్ రాజునే. ఆ తరువాత కూడా ఈ ఇద్దరూ కలిసి 'సీతమ్మవాకిట్లో సిరిమల్లె చెట్టు' సక్సెస్ ను అందుకున్నారు. అప్పటి నుంచి ఇద్దరి మధ్య మంచి సాన్నిహిత్యం ఉంది. అందువల్లనే ఒక పవర్ఫుల్ సబ్జెక్ట్ ను శ్రీకాంత్ అడ్డాల తయారు చేసుకుని వెళ్లి దిల్ రాజుకు వినిపించాడట.

ఈ కథకి బాలకృష్ణ గారు అయితేనే కరెక్ట్ .. ఆయన చేస్తేనే బాగుంటుందని భావించిన దిల్ రాజు, ఆయనను బాలకృష్ణ దగ్గరికి పంపించాడట. కథ వినగానే బాలకృష్ణ గ్రీన్ సిగ్నల్ ఇచ్చారని అంటున్నారు. అలాగని గోపీచంద్ మలినేని దర్శకత్వంలోని సినిమాను పూర్తిచేయగానే బాలకృష్ణ ఈ ప్రాజెక్టుపైకి వస్తారని చెప్పలేం. ఎందుకంటే ఎన్టీఆర్ సినిమా పూర్తి చేసిన తరువాత బాలకృష్ణతో చేయాలనే ఆలోచనలో కొరటాల వున్నారు. ఇక ఆల్రెడీ బాలకృష్ణకి కథ చెప్పి ఓకే అనిపించేసుకుని అనిల్ రావిపూడి ఉన్నారు. మరో వైపున 'అఖండ' సీక్వెల్ కి బోయపాటి ఎక్కువ సమయం తీసుకోడనే టాక్ వినిపిస్తోంది.

ఈ నేపథ్యంలో శ్రీకాంత్ అడ్డాలతో బాలకృష్ణ చేయడానికి చాలా సమయం పట్టేదిలానే ఉంది. మరి అప్పటివరకూ వేచి ఉండటం కష్టమే కనుక, ఈ లోగా మరో హీరోతో .. మరో కథతో శ్రీకాంత్ అడ్డాల సెట్స్ పైకి వెళ్లే అవకాశాలు ఉన్నాయి. ఇటీవల శ్రీకాంత్ అడ్డాల దర్శకత్వంలో వచ్చిన 'నారప్ప'కి మంచి టాక్ వచ్చింది. అయితే అది రీమేక్ కావడం వలన, పైగా ఓటీటీలో రావడం వలన శ్రీకాంత్ అడ్డాలకి ఒరిగిందేమీ కనిపించలేదు. అందువలన సాధ్యమైనంత త్వరగా ఒక హిట్ కొట్టాలనే పట్టుదలతో ఆయన ఉన్నాడు. ఆయన నిరీక్షణ త్వరలో ఫలిస్తుందేమో చూడాలి.