బాలయ్య నయా లుక్ బోయపాటి కోసమేనా..?

నందమూరి బాలకృష్ణ ఏమి చేసినా అది సంచలనం సృష్టిస్తుంది. ఇక సినిమాల పరంగా తాను ఏ పాత్ర చేసినా అందులో లీనమవడంతో పాటు ఆ పాత్ర కోసం ఏం చేయడానికైనా బాలకృష్ణ సిద్దంగా ఉంటాడు. ‘రూలర్‌’ సినిమా కోసం బరువు తగ్గి ఐరన్‌ మ్యాన్ లుక్‌తో అదరగొట్టిన విషయం తెలిసిందే. ఈ చిత్రంలో స్టైలీష్‌ లుక్‌లో ఆకట్టుకున్న బాలయ్య తాజాగా ఒక కొత్త లుక్ తో దర్శనమిచ్చాడు. చిన్నపాటి జుట్టు గుబురు మీసంతో కనిపించిన బాలయ్య లుక్‌ చూసి ఫ్యాన్స్‌ ఫిదా అవుతున్నారు. ఈ సినిమా కోసం కూడా 5 కేజీల బరువు తగ్గిన బాలయ్య ఇప్పుడు ఈ లుక్ ద్వారా మరోసారి సోషల్‌ మీడియాలో హాట్‌ టాపిక్‌గా మారారు.

బోయపాటి శ్రీనివాస్‌ దర్శకత్వంలో తెరకెక్కుతున్న తన కొత్త చిత్రంలో భాగంగానే బాలయ్య ఈ లుక్ లో కనిపిస్తున్నారని సినీ అభిమానులు అనుకుంటున్నారు. ఇక ఈ సినిమాలో బాలయ్యను డిఫరెంట్‌ షేడ్స్‌లో చూపించే ప్రయత్నం చేస్తున్నారట బోయపాటి శ్రీను. అంతేకాకుండా మాస్ ఆడియన్స్‌ను దృష్టిలో ఉంచుకొని ఈ సినిమాలో బాలయ్య క్యారెక్టర్‌ను ప్రత్యేకంగా డిజైన్‌ చేశారట. ఇందులో భాగంగా 'అఘోరా' పాత్రలో కనిపించనున్నారని సమాచారం. అయితే బాలయ్యకు సంబంధించి ఈ న్యూలుక్‌ సినిమా కోసమా లేక సాధారణంగా దిగిన ఫోటోనా తెలియాల్సి ఉంది.

కరోనా ఎఫెక్ట్ వల్ల ప్రస్తుతం షూటింగ్ ఆపేసుకున్న చిత్ర బృందం, తదుపరి షెడ్యూల్ కోసం వారణాసి వెళ్లనున్నారని సమాచారం. 'రూలర్' సినిమా తీవ్రంగా నిరాశపరచడంతో పాటు అంతకుముందు వచ్చిన ఎన్టీఆర్‌ బయోపిక్‌లు కూడా బాక్సాఫీస్‌ వద్ద బోల్తాపడ్డాయి. దీంతో బాలయ్యతో పాటు నందమూరి ఫ్యాన్స్‌ కూడా బోయపాటి శ్రీనివాస్‌ పైనే ఆశలు పెట్టుకున్నారు. ఈ చిత్రంతోనైనా బాలయ్య సక్సెస్‌ ట్రాక్‌ ఎక్కాలని అభిమానులు కోరుకుంటున్నారు. అంజలి హీరోయిన్ గా నటిస్తున్న ఈ భారీ బడ్జెట్ చిత్రాన్ని మిరియాల రవీందర్ రెడ్డి నిర్మిస్తుండగా థమన్ మ్యూజిక్ అందిస్తున్నారు.