క్రిష్ కు ఇది కూడా సగమేనా ?

ఎన్టీఆర్ కథానాయకుడు బుధవారం థియేటర్లలో అడుగుపెడుతోంది. ఎన్టీఆర్ జీవితాన్ని ఆవిష్కరించే ప్రయత్నంగా దీని మీద అభిమానులకు భారీ అంచనాలు ఉన్నాయి. ఇకపోతే దీని ప్రమోషన్ లో భాగంగా టీం లో కీలకమైన యాక్టర్స్ తో చేసిన రౌండ్ టేబుల్ వీడియో ఇంటర్వ్యూలో పలు ఆసక్తికరమైన సంఘటనలు వీళ్ళు షేర్ చేసుకోవడం ఆసక్తికరంగా మారింది. బయోపిక్ ని డైరెక్ట్ చేసింది క్రిష్ అయినప్పటికీ చాలా సందర్భాల్లో తామంతా బాలకృష్ణ చెప్పినట్టు విన్నామని చెప్పడం చూసినవాళ్ళకు షాక్ ఇచ్చింది.

హరికృష్ణ ఎలా ఉండేవాడో బాబాయ్ చూపించాడని కళ్యాణ్ రామ్ ... ఏ ఎన్ ఆర్ సెట్స్ లో ఎలా ఉండేవారో తనకు నేర్పించారని సుమంత్... చంద్రబాబు నాయుడు బయట వ్యవహరించే తీరు ఎలా ఉంటుందో వివరించారని రానా ఇలా అందరూ బాలకృష్ణ కే ఫుల్ క్రెడిట్స్ ఇచ్చేసాడు. ఫ్లోలో బాలయ్య సైతం అవును తానూ కొంత భాగం డైరెక్ట్ చేయాల్సి వచ్చిందని చెప్పడం కొసమెరుపు.

అయితే ఇదంతా సరదాగా నడిచిపోయింది కాబట్టి క్రిష్ ఏమంత సీరియస్ గా తీసుకోలేదు. అయితే మణికర్ణికను సగమే తీసి కంగనా రౌనత్ చేతికి ఇచ్చి వచ్చిన క్రిష్ ఎన్టీఆర్ లో కూడా తన పాత్ర సగమే ఉండేలా చేసుకున్నాడా అనే అనుమానం తలెత్తక మానదు. అసలు తేజ ఇలాంటి అభిప్రాయ భేదాల వల్లే మొదట్లోనే డ్రాప్ అయ్యాడని గతంలోనే వార్తలు వచ్చాయి. మరి ఇప్పుడు వీళ్ళందరూ చెప్పిన ప్రకారం చూస్తే బాలయ్య సగం కెప్టెన్ గా వ్యవహరించింది నిజమే కాబోలు అనిపిస్తోంది.