బాలయ్య మరో సింహం తో రాబోతున్నాడట!

బాలయ్య అఖండ సినిమా తో ఘన విజయాన్ని సొంతం చేసుకున్నాడు. చాలా కాలంగా బాలయ్య అభిమానులు ఎదురు చూస్తున్న సక్సెస్ అఖండతో పడింది. బాలయ్య పని అయిపోయిందని వ్యాఖ్యలు చేసిన వారికి ఖచ్చితంగా అఖండ గట్టి సమాధానం అనడంలో ఎలాంటి సందేహం లేదు. అభిమానులు ఎలాంటి సినిమాను ఆశిస్తున్నారో అలాంటి సినిమాను బోయపాటి ఇచ్చాడు. ప్రస్తుతం గోపీచంద్‌ మలినేని దర్శకత్వంలో బాలయ్య సినిమా రూపొందుతోంది.

క్రాక్‌ సినిమా తో దర్శకుడిగా గోపీచంద్ మలినేనికి గత ఏడాది బిగ్గెస్ట్‌ బ్లాక్ బస్టర్ దక్కింది. కనుక ఈ సినిమా బాలయ్య అభిమానులకు చాలా స్పెషల్‌ గా చెప్పుకోవచ్చు. బాలయ్య ఇమేజ్ కు తగ్గట్లుగా ఒక రియల్‌ ఇన్సిడెంట్‌ మరియు పాత్రలను తీసుకుని కథ అల్లి బాలయ్య తో సినిమాను తెరకెక్కిస్తున్నట్లుగా ఇప్పటికే దర్శకుడు ప్రకటించాడు. సినిమా గురించిన పుకార్లు మరియు వార్తలు అంచనాలు భారీగా పెంచాయి.

తాజాగా ఈ సినిమా టైటిల్‌ గురించి మరో పుకారు షికారు చేస్తోంది. సినిమా షూటింగ్‌ చకచక జరుగుతున్న ఈ సమయంలో టైటిల్ ను ఖరారు చేసినట్లుగా తెలుస్తోంది. ఎన్నో టైటిల్స్ ను పరిశీలించిన తర్వాత బాలయ్య చివరకు వీర సింహా రెడ్డి టైటిల్‌ ను కన్ఫర్మ్‌ చేసినట్లుగా వార్తలు వస్తున్నాయి. ఇదే టైటిల్‌ ను అధికారికంగా ప్రకటించే అవకాశాలు ఉన్నాయని సమాచారం అందుతోంది. బాలయ్య అభిమానులు ఈ టైటిల్‌ పై చాలా ఆసక్తిగా ఉన్నారు.

ఇప్పటి వరకు బాలయ్య కెరీర్ లో ఎన్నో సినిమాల టైటిల్స్ సింహ అనే పదంతో వచ్చాయి. నరసింహ నాయుడు మొదలుకుని పలు సినిమాలు వచ్చి మంచి విజయాన్ని సొంతం చేసుకున్నాయి. కొన్ని సినిమాలు అందులో ప్లాప్‌ అయినవి కూడా ఉన్నాయి. కాని మెజార్టీ అభిమానులు మాత్రం బాలయ్య సినిమాకు సింహా పదం ఉండే టైటిల్‌ కావాలని ఆశిస్తున్నారు. గోపీచంద్‌ ఇప్పుడు అదే నిర్ణయాన్ని తీసుకునే అవకాశాలు కనిపిస్తున్నాయి.

సినిమాలో బాలయ్య పాత్ర పేరు వీర సింహా రెడ్డి గా సమాచారం అందుతోంది. కనుక సినిమా టైటిల్ ను అదే ఖరారు చేసే అవకాశాలు ఉన్నాయంటున్నారు. పెద్ద ఎత్తున అంచనాలున్న వీరి కాంబో మూవీ టైటిల్‌ తోనే అంచనాలు డబుల్‌ చేయాలని మేకర్స్ తీవ్రంగా ప్రయత్నాలు చేస్తున్నారు. అందుకోసం తీవ్ర ప్రయత్నాలు చేస్తున్నారు. రికార్డు స్థాయి వసూళ్లు దక్కించుకున్న అఖండ సినిమా తర్వాత వస్తున్న సినిమా అవ్వడంతో ఈ సినిమా పై అంచనాలు భారీగా ఉన్నాయి.

నేడు ఈ సినిమాకు సంబంధించిన కీలక అప్డేట్‌ ను అధికారికంగా ప్రకటించబోతున్నట్లుగా మేకర్స్ సోషల్‌ మీడియా ద్వారా తెలియజేశారు. వారి నుండి రాబోతున్న ప్రకటన టైటిల్‌ కు సంబంధించి అయ్యి ఉంటుందని.. ఆ టైటిల్‌ వీరసింహా రెడ్డి అయ్యి ఉంటుందని అభిమానులు భావిస్తున్నారు. ఇప్పటికే చాలా సార్లు సింహా టైటిల్స్ తో వచ్చిన బాలయ్య మరో సారి అదే తరహా టైటిల్‌ తో రావడం అభిమానులకు ఆనందాన్ని కలిగిస్తుంది. కనుక దర్శకుడు అనుమానం లేకుండా ఈ టైటిల్‌ ను ఖరారు చేయవచ్చు అనే అభిప్రాయం ను కొందరు ఇండస్ట్రీ వర్గాల వారు వ్యక్తం చేస్తున్నారు.