బాలయ్య సరికొత్త రికార్డ్.. చరిత్ర తిరగరాసిన 'అఖండ' టీజర్..!

నందమూరి బాలకృష్ణ - బోయపాటి శ్రీను కాంబినేషన్ లో వస్తున్న హ్యాట్రిక్ మూవీ ''అఖండ''. ఉగాది ఉగాది కానుకగా టైటిల్‌ రోర్ పేరుతో ఈ యాక్షన్ ఎంటర్టైనర్ టీజర్ ని విడుదల చేశారు. ఏప్రిల్‌ 13న యూట్యూబ్‌ లో అప్లోడ్ చేయబడిన ఈ టీజర్ రికార్డు స్థాయి వ్యూస్ రాబడుతూ సెన్సేషన్ క్రియేట్ చేస్తోంది. రోజుకో రికార్డ్ బ్రేక్ చేస్తూ దూసుకుపోతున్న బాలయ్య టీజర్.. తాజాగా 50 మిలియన్ల వ్యూస్ మార్క్ ని క్రాస్ చేసింది. కేవలం 17 రోజుల్లోనే ఈ ఫీట్ సాధించి.. అత్యంత తక్కువ సమయంలో 50 మిలియన్ వ్యూస్ దక్కించుకున్న తెలుగు టీజర్‌ గా 'అఖండ' సరికొత్త రికార్డ్ క్రియేట్ చేసింది.

బాలయ్య 'అఖండ' టీజర్ ముందు సీనియర్ స్టార్ హీరోలు, జూనియర్ హీరోల రికార్డులన్నీ తుడిచిపెట్టుకొని పోయాయి. 'బాహుబ‌లి' 'ఆర్.ఆర్.ఆర్' 'సాహో' లాంటి భారీ చిత్రాల రికార్డుల‌ను ఈ టీజ‌ర్ అల‌వోక‌గా క్రాస్ చేయడం విశేషం. RRR 'రామరాజు ఫర్‌ భీమ్‌' వీడియో 50 మిలియన్ల వ్యూస్‌ ను చేరుకునేందుకు 6 నెలల సమయం పట్టింది. ఇక అల్లు అర్జున్ 'పుష్ప' టీజర్ 20 రోజుల్లో 50M వ్యూస్ రాబట్టి తక్కువ టైంలో ఈ ఘనత సాధించిన తెలుగు టీజర్ గా నిలిచింది. కానీ 'అఖండ' టీజర్ కేవలం 17 రోజుల్లోనే ఈ ఫీట్ ని సాధించి 'పుష్ప' రికార్డ్ ని బ్రేక్ చేసింది.

బాల‌య్య సరికొత్త గెటప్.. ఆయన చెప్పిన డైలాగులు.. బోయపాటి మార్క్ యాక్షన్.. థమన్ అందించిన బ్యాగ్రౌండ్ స్కోర్ ఈ టీజర్‌ కు ఊహించని రీతిలో స్పందన లభించడానికి కారణమయ్యాయి. బోయపాటి - బాలయ్య కాంబో వస్తున్న ఈ సినిమాపై ఏ స్థాయిలో అంచనాలు ఉన్నాయనేది ఈ టీజర్ రికార్డులు తెలియజేస్తున్నాయి. టాలీవుడ్ లో 'అఖండ' టీజర్ సరికొత్త రికార్డ్ క్రియేట్ చేయడంతో నందమూరి ఫ్యాన్స్ ఖుషీ అవుతున్నారు. కాగా, బాలకృష్ణ ద్విపాత్రాభినయం చేస్తున్న ఈ చిత్రంలో శ్రీకాంత్ విలన్ గా.. ప్రగ్యా జైస్వాల్ హీరోయిన్ గా నటిస్తున్నారు. ద్వారకా క్రియేషన్స్ పతాకంపై మిర్యాల రవీందర్‌ రెడ్డి ఈ చిత్రాన్ని నిర్మిస్తున్నారు.