'ఆహా' కోసం బాలయ్య 'అన్ స్టాపబుల్'..?

వెండితెర పై రాణించిన పాపులర్ స్టార్స్.. బుల్లితెర మీదకు వస్తున్నారంటే అది ప్రేక్షకుల్లో ప్రత్యేకమైన క్రేజ్ ను సొంతం చేసుకుంటుంది. మెగాస్టార్ చిరంజీవి - కింగ్ నాగార్జున - యంగ్ టైగర్ ఎన్టీఆర్ మొదలుకొని.. దగ్గుబాటి రానా - నాని - ఆలీ వరకు చాలా మంది సెలబ్రిటీలు స్మాల్ స్క్రీన్ మీద అదరగొట్టారు. మంచు లక్ష్మి - సమంత - తమన్నా వంటి వారు స్పెషల్ టాక్ షోలు - వంటల షోలు చేసి అలరించారు. అయితే ఇప్పుడు వీరి బాటలోనే నటసింహం నందమూరి బాలకృష్ణ ఓ టాక్ షో చేయబోతున్నారని టాక్ నడుస్తోంది.

తెలుగు ప్రేక్షకులకు వినోదాన్ని అందించడానికి 100 శాతం తెలుగు కంటెంట్ తో డిజిటల్ రంగంలో అడుగుపెట్టిన ఓటీటీ 'ఆహా'. ఇప్పటికే పలువురు సెలబ్రిటీలతో చిట్ చాట్ షోలు చేసిన ఆహా.. త్వ‌ర‌లో బాల‌కృష్ణ హోస్ట్‌ గా ఓ టాక్ షో ప్లాన్ చేస్తున్నారట. దీనికి 'అన్ స్టాపబుల్' అనే పేరుని అనుకుంటున్నట్లు టాక్. ఇందులో ప‌లువురు సినీ ప్ర‌ముఖులతో బాలయ్య ముచ్చటించబోతున్నారు. ఈ ఆస‌క్తిక‌రమైన టాక్ షో గురించి అతి త్వ‌ర‌లోనే క్లారిటీ వ‌చ్చే అవ‌కాశం ఉంది.

ఒకవేళ బాలకృష్ణ టాక్ షో చేసేది నిజమే అయితే.. మిగతా అన్నింటి కంటే అది ప్రత్యేకంగా ఉంటుందని చెప్పవచ్చు. ఎందుకంటే నటసింహం స్క్రీన్ మీద నటించే విధానం.. బయట ప్రవర్తించే శైలి భిన్నంగా ఉంటాయి. పురాణాలు ఇతిహాసాలు చరిత్ర మీద ఎంతో అవగాహన కలిగివున్న బాలయ్య చేయబోయే షో ఎలా ఉంటుందో చూడాలనే ఆసక్తి అందరిలో ఎక్కువైంది. త్వరలో దీనికి సంబంధించిన ప్రకటన వస్తుందేమో చూడాలి.

ఇక సినిమా విషయానికొస్తే.. నందమూరి బాలకృష్ణ వరుస సినిమాలతో ఫుల్ బిజీగా ఉన్నారు. ఇప్పటికే బోయపాటి శ్రీను దర్శకత్వంలో ''అఖండ'' చిత్రానికి షూటింగ్‌ కి గుమ్మడికాయ కొట్టేసాడు. ‘సింహా’ ‘లెజెండ్’ వంటి బ్లాక్ బస్టర్స్ తర్వాత బాలయ్య - బోయపాటి కలయికలో వస్తున్న ఈ సినిమా పై భారీ అంచనాలు నెలకొన్నాయి. దీని తర్వాత 'క్రాక్' దర్శకుడు గోపిచంద్ మలినేని తో బాలయ్య ఓ సినిమా చేయనున్నాడు. అలానే అనిల్ రావిపూడి - పూరి జగన్నాథ్‌ - క్రిష్ జాగర్లమూడి లతో సినిమాలు లైన్ లో ఉన్నాయి.